Эдуард Попов – Россия күрэхтэһиитигэр үһүстээтэ

Бүгүн Чечня Республикатын киин куоратыгар көҥүл тустууга 21-гэр диэри саастаахтар Россия үрдүнэн бастыыр иһин күрэхтэһиилэрэ ыытыллан түмүктэннэ. Бүтэһик күн саха тустууга кыһатын иитиллээччитэ, былырыын эмиэ манна, Грознайга – Андрей Мидловец, Артём Слепцов кэннилэриттэн 61 киилэҕэ үһүс миэстэлэммит Эдуард Попов үчүгэй хапсыһыылары көрдөрөн, боруонса мэтээлинэн наҕараадаланна.

Түгэнинэн туһанан Эдуарды бэйэтин уонна тренердэрин, Саха сирин тустууга хамаандатын эҕэрдэлиибит! Тутатына итиитигэр Эдуард бастакы тренерэ, Бүтүн Россиятааҕы категориялаах судьуйа, хапсаҕайга Саха Республикатын спордун маастара, В.П. Керемясов аатынан Дьокуускай куорат 3 №-дээх спортивнай оскуолатын тренерэ Станислав Егорович Афанасьевы эмиэ эҕэрдэлээн туран, иитиллээччитин туһунан кылгастык билиһиннэрэригэр көрдөстүбүт.

–Эдик 1-кы кылаастан миэхэ дьарыктаммыта, – диир Станислав Афанасьев. – Ийэтэ Тулагыттан, аҕата Хатастан төрүттээхтэр. Аҕаларын кытта сылдьан сүрдээх үлэһит уолаттар. Үс бииргэ төрөөбүттэр, үһүөн Чурапчыга үөрэнэллэр. Кыра уолаттары Тулагыга уолбунаан иккиэн дьарыктаабыппыт. Онон икки кыра уолум Байан Станиславовичка дьарыктаммыттара. Бэһис кылааска Чурапчыга ыыппыппыт, дьонун кытта сүбэлэһэн. Бастаан Төлөйгө эдэр тренердэр Токпоков Евгенийгэ, Кузьмин Александрга эрчиллибитэ, оттон интернат- оскуолаҕа, бэйэм однокурсникпар Альберт Гаврильевич Макаровка туттарбытым.

Эдик Чурапчыга күүстээх оскуоланы баран, оҕо да сылдьан кэккэ ситиһиилэрдээх. Бу, тренердэр Альберт уонна Юрий Афанасьев үлэлэрин түмүгэ, икки сыл субуруччу Россия призера буолла. Финалга да тахсыа эбит, ону судьуйалар кавказтарга аһара көмөлөһөллөр.

Чурапчы оскуолатыгар, Тулагыларга истиҥ эҕэрдэ! Төрөппүт өтө көрүүтэ, оҕолорун инникилэрин оҥоруулара. Төрөппүттэргэ эмиэ эҕэрдэ уонна Махтал!

“Дьулурҕан”.

Элен Тастыгина хаартыскаҕа түһэриитэ.