Данил Данилов: «Маннык куонкуруска иккис кыайыым»

Көҥүл тустууга Европа чемпионатыгар анаан «Дьулурҕан» тустууну таптааччыларга билгэлээһин-куонкурус тэрийбитэ. Кыайыылааҕынан Данил Данилов таҕыста. Бүгүн киниэхэ бирииһэ туттарылынна. Уонна үгэһинэн кылгас билиһиннэрэр сэһэргэһии буолла.

-Данил, бастатан туран, кыайыыгынан эҕэрдэлиибин! Бэйэҕиҥ кылгастык билиһиннэр эрэ. Сэҥээрэр киһи элбэх.

-Бэйэм Орто Халыматтан төрүттээхпин, Сылгы Ыытартан. Оскуолаҕа сылдьан көҥүл тустуунан дьарыктаммытым. Билигин Намҥа олоробун. Кэргэннээхпин, үс оҕолоохпун. Росгвардияҕа үлэлиибин.

-Куонкурус туһунан тугу этиэҥ этэй?

-Куонкурус усулуобуйатын ватсаапка, «Көҥүл тустуу» бөлөҕөр билбитим. Тута кыттарга санаммытым. Ити кэмҥэ Дьокуускай – Владивосток хайысхатынан айанныы сылдьыбытым. Эппиэттэри ылыы наһаа ыгым этэ, күн аҥарын иһигэр ыыта охсуохтааххын диэн этэ дии. Онон мин бэйэм сылыктааһыммын төбөбөр оҥоро охсоот, ыытан кэбиһиэхпин баҕарбытым даҕаны, айан суолугар интернет сүгүн-саҕын хаппат буолан, сотору-сотору тохтуу-тохтуу ыыта сатаабытым…

Маннык куонкурустар үчүгэй бөҕө буоллахтара дии.

Арба, маннык куонкуруска иккис кыайыым. Былырыын суруналыыс Николай Бястинов, Олимпиада тустуутугар анаан ыыппыт куонкурсугар бастаабытым.

Бу кэмҥэ аттыгар турар кэргэнэ: «Данил оҕо эрдэҕиттэн спорду, тустууну таптыыр. Кумааҕы тустууктары үрэн туһуннарыыттан саҕалаан. Ону тэҥэ тустуу статистикатын сурунар аҕай этэ. Тэтэрээттэрэ элбэхтэр, онтукайа көмөлөспүт буолуохтаах», – диэн бигэргэтэр.

Салгыы Данил:

– Тустуу сонуннарын көтүппэккэ ватсаабынан, ютубунан көрөбүн. Онон барытын билэ-көрө сатыыбын.

-Дьэ, кырдьык, бэриниилээх ыалдьааччы эбиккин. Өссө төгүл эҕэрдэ!

х х х

Манна сыһыары тутан эттэххэ, Данил – «Дьулурҕан» куонкурсугар аан бастаан кыайда. Кини, ыйааһыннарынан кимнээх бастыахтарай, диэн ыйытыыга 10 киһиттэн 8-һын сөпкө суруйан – 16, сүүрбэ финалистан – 14 уонна Тютрин үһүс буолуо диэн – 3 очкону ылла.

Итинэн Данил Данилов – Андрей Александров, Валерий Ефремов, Иван Рожин, Федора Захарова курдук, элбэх куонкурустар кыайыылаахтарын кэннигэр хааллартаата. Ылан көрдөххө, маннык тэрээһиннэргэ ылбычча киһи кыттыбат, бэлэмнээх, бэйэтигэр эрэллээх, билиилээх-көрүүлээх эрэ киһи кыттар. Билгэлээһин-куонкурус син эмиэ күрэс курдук ээ.

Аны маннык куонкурус бэс ыйыгар, Россия көҥүл тустууга чемпионатын иннинэ тэриллиэ. Онно, этэргэ дылы, тиискитин-уоскутун эрдэттэн оҥосто, бэлэмнэнэ сылдьыҥ.

Петр ПАВЛОВ.

Ааптар хаартыскаҕа түһэриитэ.