Бурятия көбүөрүгэр бөҕөстөрбүт хайаһыахтарай?

Муус устар 4-5 күннэригэр Бурятия киин куоратыгар Улан-Удэҕэ «Байкал Опен» диэн спортивнай тустууга (эр дьоҥҥо уонна дьахталларга) норуоттар икки ардыларынааҕы XXVII турнир ыытыллар.

Быйылгы турнирга барыта уонча дойду бөҕөстөрө ыҥырылыннылар. Ол курдук, Аргентина, Доминиканскай Республика, Испания спортсменнара аан бастаан Бурятия көбүөрүгэр үктэниэхтэрэ. Сайаапкаттан көрдөххө, ордук элбэх кыттааччыны ыаллыы сытар Монголия хамаандата аҕалар эбит. Кинилэр аҥардас эр дьоҥҥо – 67 бөҕөстөөхтөр. Ол иһигэр 57 киилэҕэ – 14 баатыр күөн көрсүөҕэ, күрэс былдьаһыаҕа.

Күрэхтэһии биир бэлиэ түгэнинэн, Россия үс төгүллээх чемпиона, Европа чемпиона, Европа оонньууларын кыайыылааҕа, 35 саастаах Александр Богомоев улахан көбүөргэ эргиллиитэ буолуоҕа. Санатан эттэххэ, Богомоев үс сыллаах тохтобул кэнниттэн былырыын Саҥа дьыл аҕай иннинэ И.Гармаев аатынан Бүтүн Россиятааҕы турнирга кыттан, 65 киилэҕэ кыайыылааҕынан буолбута. Онон бу кини, тохтобул кэнниттэн иккис тустуута.

Бу түһүлгэ аны сайын Москваҕа ыытыллар Россия чемпионатыгар сүүмэрдиир сыаллаах-соруктаах буолан – тыҥааһыннаах. Спортсменнарбытыгар ситиһиилээх кыттыыны баҕарабыт!

Саха сириттэн эр дьоҥҥо кыттыахтара:

57 кг Постников Федор, Иванов Эльдар, Семенов Кэскил, Ашеин Любомир;

61 кг Ильинов Манчаары, Заболоцкай Николай, Константинов Петр, Явловскай Егор, Слепцов Артем, Терентьев Ньургун, Адамов Петр;

65 кг Жирков Николай, Кононов Арсен, Григорьев Юлиан;

70 кг Потапов Айсен, Мидловец Андрей, Свинобоев Станислав, Протодьяконов Уйгулаан;

74 кг Румянцев Андрей, Бабаранов Иннокентий, Сивцев Николай;

79 кг Николаев Роман;

92 кг Сергин Ньургун;

97 кг Толмачев Максим;

125 кг Харысхан Баппаҕай.

Маны тэҥэ дьахталларга Александра Копылова, Севиль Назарова, Евгения Огородникова, Надежда Галдина, Лилиана Рожина тустуохтара.

Былырыын биһиэннэриттэн Алексей Копылов 57 киилэҕэ бастаабыта, Никита Софронов 92 кг иккис, Никита Хабаров 125 кг үһүс миэстэ буолбуттара. Быйыл бөҕөстөрбүт дьэ хайаһыахтарай?

Ыйааһын ахсын бастаабыттар – 70 000, иккистээбиттэр — 50 000, үһүс буолбуттар — 30 000 солк. харчынан наҕараадаланыахтара. Кыайыылааҕы бэлэмнээбит тренер 30 000 солк. бэлиэтэниэҕэ.

Күрэхтэһии торума:

Муус устар 4 күнэ, бээтинсэ

11:00 — Барыллааһын хапсыһыылар

18:00 — Күрэхтэһиини үөрүүлээхтик аһыы

19:00 — Финалга тахсар иһин киирсиилэр.

Муус устар 5 күнэ, субуота

12:00 — Уоскутар бөлөх тустуулара

16:00 — Финаллар. Кыайыылаахтары наҕараадалааһын.

«Дьулурҕан».