Бэртээхэй киинэни, киинэ оҥоорооччулар бэлэхтээбиттэр

Настя Диодорова туһунан бэртээхэй киинэни бэлэхтээтилэр, Саха сирин киинэни оҥорооччулара. Киноиндустриябыт чахчы сайдыбыт, Голливуд киинэлэриттэн ордордум. Өссө английскайдыы тылбаастаатахха, аан дойдуга да тахсыыһы.

Саха ыалын олоҕо, оҕоҕо таптала, эйэтэ толору көстөр. Баары-баарынан көрдөрбүттэр. Настяны оскуола коллектива туоратыыта, спорткомитеппыт көһүүннүк сыһыаннаһыыта, ийэтин-аҕатын харахтарын уулара барыта баар. Көрөөччү долгуйар, кырдьаҕас өртө ытыыр даҕаны. Эдэрдэр да бааллар, ытыстарын таһыналлар.

Саха театра букатын ыраах хаалбыт. Былыргы хаалынньаҥ өйү-санааны тутан олороллоро, аныгы кэми кытта киинэлэр курдук тэҥҥэ хаампаттара көстөн таҕыста. Оттон киинэни эдэр сценаристар, режиссердар артыыстар букатын үрдүк таһымҥа таһаарбыттар эбит.

Бу аттыгар, Мэҥэҕэ баар дьон: оҕо, ийэтэ аҕата аан дойдуга тахсар Геройдар эбиттэр.

Көрөөччү быһыытынан Настяны оонньообут артыыһы сөбүлээтим. Ол эрээри, аҕатын Алексейы чугастык ылынным. Кини биһиги көлүөнэ уола, 1958 сыллаах, Чурапчы интернат-оскуолатын 1975 сылга бүтэрбит, Д.П. Коркин эрчийбит уола. Бу выпуск туһунан кэлин Далан “Дьикти сааһыгар” майгынныыр роман да суруллуон сөп. Ханна да суох кылаас. Бары кэриэтэ аатырбыт уолаттар, кыргыттар кылаастара.

Алексей Москваҕа Темерязов институтугар, тустуу тренеринэн үлэлээбит эбит. Настяны 4-5 сааһыттан институт бассейыныгар дьарыктаабыт, сырытыннарбыт. Кыыһыгар олус чугас сыһыаннаах, дьиҥнээх амарах аҕа буолара киинэҕэ көһүннэ.

“Кыыспын спорт аралдьытыа, кынаттыа” – диэн олус сөп толкуйдаах эбит. Киинэҕэ куруук кини үөрүүнү дьиэҕэ киллэрэр. Кэргэнин, кыыһын санаатын өрө көтөҕө сатыыра көстөр. Настяны кыра эрдэҕиттэн бэйэтин методикатынан дьарыктаабыт. Онон тренергэ бэлэм пловчиха тиксибит. Карьерата тута үөһээ барбыт.

Онон киинэ дьиэ-кэргэн аҕаттан тутулуктааҕын ырылыччы көрдөрөр. Ийэ хаһан баҕарар уларыйар, ыараханы уйара уустуктардаах. Ону киинэ эмиэ көрдөрөр.

Саха ыалын аҕатын атын омуктар ордургуохтара диэн саныыбын. Кини харчыны эккирэппэт, булара уустуктардаах, ол эрээри, дьиэҕэ үөрүүнү сатаан киллэрэрин эдэр талааннаах режиссердар булан көрдөрбүттэр. Ол иһин Настя ыарахантан тостубатах, сибэкки курдук тыллан кэлбит.

Бэртээхэй киинэни, киинэ оҥоорооччулар бэлэхтээбиттэр.

Федот ХАРИТОНОВ.

Мэҥэ Хаҥалас.