“Бэргэн» футболистара «Чыпчаал» Кубогын хаһаайыннара

Муус устар 26 күнүгэр уһун тохтобул кэнниттэн «Үлэ күүһэ» хаһыат 75 сыллаах үбүлүөйүн көрсө оҕолорго аналлаах мини-футболга «Чыпчаал Кубога» ыытылынна.

Редакция кэлэктиибэ оҕо спордун көҕүлүүр туһуттан, 2006 с. «Чыпчаал» Кубогын тэрийэн кэллэ. 2019 сыллаахха дойду үрдүнэн Ковид ыарыыта туран, биһиги оҕолорго аналлаах спорт бырааһынньыгын тохтоторго күһэллибиппит. Быйыл бастакы хаһыат бэчээккэ тахсыбыта 75 сылыгар анаан, күрэхтэһиини сөргүттүбүт.

Бу күн Аан дойдуга 1 ✓дээх спорт көрүҥэр аҕыс хамаанда, 80-ча эдэр футболист бастыҥ ааты былдьаста. Күрэхтэһиини солбуллубат киһибит, тренер Аркадий Васильев бэркэ көҕүлээн ыыппытыттан махталбытын аныыбыт. Кини «Чыпчаал» Кубогар саҥаттан саҥа сүүрээннэри киллэрэн, күрэхтэһиини сытыырхатар. Кини «пенальти» тэбиитигэр оҕолору тургуппута, инникитин улахан уопут буолуо.

«Пенальтига» үс бастыҥ иһигэр «Бэргэн», «Бэдэр», «Бэрдьигэс» киирдилэр.

Оттон футболга бэрт сытыы киирсиилэр кэннилэриттэн финал аҥаарыгар «Харысхал», «Хатан», «Барыс», «Бэргэн» хамаандалара тахсан, мэтээл иһин киирсэр кыахтаннылар.

Үһүс миэстэ иһин киирсиигэ «Барыс» (ДЮСШ) 1:0 ахсаанынан «Хатаннары» ( В.В.Филиппов аатынан гимназия -2) хотон, боруонса мэтээли ылар чиэстэннилэр.

Күүрүүлээх «Чыпчаал» Кубогын ылар иһин оонньуута олус сытыытык барда. «Харысхал» (В.В.Филиппов аатынан гимназия-1) хамаандата бастакы таймҥа 1:0 инники иһэн, иккискэ ахсааны тэҥнэтэн кэбистэ. Оонньуу пенальтига баран эрдэҕинэ, 8 сөк. хаалбытын кэнниттэн «Бэргэннэр» (Семен Данилов аатынан оскуола) биир мээчиги киллэрэн, 2:1 «Чыпчаал» Кубогын саҥа хаһаайыннарынан буоллулар.

Күрэхтэһии бастыҥ оонньооччуларыгар спонсордар олохтообут сыаналаах бириистэринэн наҕараадаланнылар.

Хас эмэ сыллаах тохтобул кэнниттэн күрэхтэһиибит үрдүк таһымҥа ыытылларыгар, биһиэхэ спонсордар улахан көмө буоллулар. Хаһааҥҥытааҕар да сыаналаах бириистэр тураннар, оҕолор үөрүүлэрэ үксээтэ. Бэйэлэрэ да соһуйан махталларын биллэрдилэр. Үөрбүт-көппүт харахтарын, мичээрдэрин көрөн киһи эрэ үөрүөх курдук. Онон биһиги оҕолорбутугар бырааһынньыгы бэлэхтээбит дьоммутугар махталбытын тириэрдэбит. Үлэҕит тахсыылаах буоллун, дьиэ кэргэҥҥитигэр дьол-соргу тосхойдун.

Вячеслав Алексеев. Горнай – Бэрдьигэстээх.

Ааптар хаартыскаҕа түһэриитэ.