Арыйаан Тютрин – Дьобуруопа түһүлгэтин үһүс үктэлигэр

Братиславаҕа (Словакия) көҥүл тустууга Дьобуруопа эр дьоҥҥо чөмпүйэнээтэ үгэннээн ыытылла турар. Күрэхтэһии иккис күнүгэр биэс ыйааһыҥҥа быһаарыылаах хапсыһыылар буоллулар.

Эрдэ иһитиннэрбиппит курдук, бу түһүлгэҕэ биһигиттэн, Беларусь Өрөспүүбүлүкэтин аатыттан кыттар биир дойдулаахпыт Арыйаан Тютрин 57 киилэҕэ туһунна. Санатан эттэххэ, кини икки бастакы утарсааччыларын – Украина уонна Швейцария бөҕөстөрүн холкутук кыайталаан баран, үһүс эргииргэ Азамат Тускаевка (Сербия) 1:3 ахсаанынан хотторон кэбиспитэ.

Оттон бу ыйааһыҥҥа ким үһүс бириистээх миэстэни ыларын быһаарсар киирсиигэ немец Штехелены кытта көрүстэ. Итиэннэ хапсыһыы хара ааныттан кимиилээхтик тустан, этэргэ дылы, киһитин наар ыган, түмүккэ 4:1 ахсаанынан эрэллээхтик кыайда.

Уолбут сирэйиттэн-хараҕыттан көрдөххө, үөрбүт чинчитэ биллибэт. Ол эмиэ да сөп ээ, өссө үрдүк кэрдиискэ тахсар кыахтааҕа. Ону, Тускаевтыын тустуутугар мүччү туппутуттан бэйэтэ даҕаны хомойо сылдьара биллэр.

PS: Арыйаан бары тустууларын “Дьулурҕан” телеграмҥа каналыгар t.me/dzulurgan көрүөххүтүн сөп.

Онон Арыйаан Тютрин Дьобуруопа 2025 сыллааҕы чөмпүйэнээтин 57 киилэҕэ үһүс үктэлигэр тахсан туран, боруонса мэтээли кэттэ. Ылан көрдөххө, бу киһи мыыммат үчүгэй көрдөрүүтэ. Олох кураанах хаалыахтааҕар, этэргэ диэри дьиэтигэр-уотугар, төрөөбүт дойдутугар илии тутуурдаах, өттүк харалаах кэлэри ситистэ.

Арыйаан Тютрин – билиҥҥи кэмҥэ биһиги биир тумус туттар тустуукпут. Кини күөн күрэскэ дьылҕата санаа курдук буолбатах этэ. Былырыын Парижтааҕы Олимпиадаҕа тустар быраабы ылан баран, бэлиитикэ орооһон кыттыбатаҕа хомолтолоох. Чэ, ол туһунан кэнники…

Оттон Арыйаан бэйэтин тус тренерэ – Саха сирин үтүөлээх тренерэ Иван Дмитриевтиин быйылгы Дьобуруопа чөмпүйэнээтигэр кыттарга эрдэттэн сыал-сорук туруоран, элбэх үөрэтэр-эрчиллэр түмсүүлэргэ, күрэхтэһиилэргэ кыттан, өссө хамаанда иһигэр, Братиславаҕа ким барарын быһаарар хонтуруоллур хапсыһыыга утарсааччытын Батомункуевы эрэллээхтик кыайан, улахан үлэни ыыппыттарын санатар тоҕоостоох. Этэргэ дылы, түбүктээх үлэ – түмүктээх буолла.

Түгэнинэн туһанан Арыйааны уонна кини тренердэрэ Иван Дмитриеви, Семен Петухову эҕэрдэлиэҕиҥ!

57 кг: 1. Начын Монгуш (Россия), 2. Азамат Тускаев (Сербия), 3. Арыйаан Тютрин (Беларусь), 3. Ислам Базарганов (Азербайджан).

Петр ПАВЛОВ.