Арыйаан Тютрин үһүс миэстэ иһин тустуо

Словакия Братислава куоратыгар көҥүл тустууга Европа чемпионатын бастакы күнүн түмүгүнэн биэс ыйааһыҥҥа быһаарыылаах хапсыһыыларга кимнээх киирсэллэрэ билиннэ. Бэҕэһээ саҕалаабыт Россия бөҕөстөрө бары кыһыл көмүс мэтээл иһин киирсэр кыахтаннылар.

Оттон биһиги бары, бу түһүлгэҕэ соҕотох кыттааччыбыт – Арыйаан Тютриҥҥа ыалдьан, кини тустууларын түүннэри кэтээн көрдүбүт. Арыйаан күрэхтэһиини үчүгэйдик саҕалаабыта. Украинец Керимовы уонна швейцарец Эппы, хапсыһыы болдьоҕун иннинэ очукуонан ыраастык кыайталаабыта. Финалга тахсар иһин киирсиигэ Сербияттын кыттар осетин Азамат Тускаевы кытта тустуута табыллыбата, 1:3 ахсаанынан хотторон кэбистэ.

Тютрин тустууларын “Дьулурҕан” телеграмҥа каналыгар t.me/dzulurgan көрүөххүтүн сөп.

Онон Арыйаан бүгүн түүн Штехеле (Германия) – Дингашвили (Грузия) уоскутар бөлөххө тустууларын кыайыылааҕын кытта чемпионат боруонса мэтээлин иһин тустуоҕа. Бөҕөспүтүгэр кыайыыны баҕарабыт.

Финалга тустуохтара:

57 кг Азамат Тускаев (Сербия) — Начын Монгуш (Россия)

65 кг Ибрагим Ибрагимов (Россия) — Хамзат Арсамерзуев (Франция)

70 кг Арман Андреасян (Армения) — Давид Баев (Россия)

79 кг Зелимхан Хаджиев (Франция) — Ахмед Усманов (Россия)

97 кг Гиви Матчарашвили (Грузия) — Магомед Курбанов (Россия).

Чемпионат иккис күнэ эмиэ Дьокуускай бириэмэтинэн 17:30 саҕаланар. Бүгүн 61, 74, 86, 92, 125 кг саҕалыыллар уонна 57, 65, 70, 79, 97 кг ыйааһыннарга уоскутар бөлөх тустуулара буолуохтара.

«Дьулурҕан».