Үтүөлээх тренер аатынан күрэхтэһии өрө көтөҕүүлээхтик барда

Бэрдьигэстээххэ, Саха АССР үтүөлээх тренерэ Илья Васильевич Павлов 80 сылын көрсө көҥүл тустууга аһаҕас күрэхтэһии XII төгүлүн ыытылынна.

Кэбээйиттэн, Сунтаартан, ХИФУ, ОЭбУ, Дьокуускай спортивнай оскуолаларыттан 45 эдэр бөҕөс тыҥааһыннаах хапсыһыылары көрдөрдүлэр.

Спортсменнары СӨ үөрэҕин уонна наукатын миниистирин солбуйааччы Степан Степанов, улуус баһылыга Никита Андреев, көҥүл тустуу улуустааҕы федерациятын салайааччы Алексей Аргунов, спорт салалтата Степан Константинов, Осип Михайлов, Илья Васильевич дьиэ кэргэнин аатыттан Эдуард Павлов, спорт бэтэрээннэрин аатыттан РФ, СӨ физическэй култууратын уонна спордун үтүөлээх үлэһитэ, бэтэрээннэргэ Аан дойду чемпиона Федот Соловьев эҕэрдэлээтилэр.

Күрэхтэһии ыҥырыылаах ыалдьыттарынан Илья Павлов иитиллээччилэрэ спорт бэтэрээннэрэ буоллулар. Кинилэр уруккуну-хойуккуну ахтыһан, ытыктыыр киһилэрин туһунан истиҥник ахтан, эдэр бөҕөстөр хапсыһыыларын астына көрөн, кэскиллээх уолаттардаах эбиппит диэн эрэннэллэрин эттилэр.

Бу күн урукку сылларга Горнай аатын Сойуус, Өрөспүүбүлүкэ таһымыгар чиэстээхтик көмүскээбит Валерий Скурихиҥҥа, Анатолий Колочевка, Василий Ефремовка улуус спорда сайдыытыгар сүҥкэн кылааттарын киллэрбиттэрин иһин анал бэлиэлэри туттаран үрдүк сыаналаатылар.

Ону таһынан, улууспутугар Физическэй култуура уонна спорт сайдыытыгар үлэлэһэр дьоммутугар Степан Константинов, Василий Яковлев, Степан Пахомов, өрөспүүбүлүкэҕэ көҥүл тустуу сайдыытыгар ситиһиилээхтик үлэлии сылдьар Василий Уйгуров, Николай Яковлев, Валериан Неустроев Ил Түмэн Бочуотунай Грамотатынан, улуус Махтал суругунан наҕараадаланнылар.

Күрэхтэһиигэ үс бастыҥ иһигэр киирбит бөҕөстөр Илья Васильевич Павлов дьоно-сэргэтэ, улуус салалтата, спорт бэтэрээннэрэ, оҕо спордун өйүүр спонсордар олохтообут сыаналаах бириистэринэн наҕараадаланнылар.

Биир долгутуулаах түгэн чемпионнар лотерелара буолла. Манна илиитигэр баартаах Дьокуускайтан кэскиллээх бөҕөс Ахиллес Протопопов телевизор хаһаайынынан буолан үөрүүтэ үксээтэ.

Икки сылга биирдэ ыытыллар күрэхтэһии бэркэ тэриллэн барда. Оҕолор үчүгэй тустууну көрдөрөн, дьон-сэргэ астынна. Инникитин да улууспут сайдыытыгар сүҥкэн кылааттарын киллэрсибит үтүө дьоммут ааттара-аатаныа туруо диэн эрэнэбит.

Вячеслав АЛЕКСЕЕВ. Бэрдьигэстээх – Горнай.

Ааптар хаартыскаҕа түһэриилэрэ.