Виктор Рассадин – Азия чемпионатыгар иккис буолла

Иордания Амман куоратыгар көҥүл тустууга Азия чемпионата ыытылла турар. Бастакы күн түмүгүнэн биэс ыйааһыҥҥа кыайыылаахтар билиннилэр.

Эрдэ иһитиннэрбиппит курдук, бу күрэхтэһиигэ саха тустууга кыһатыттан икки бөҕөс кытынна. Соторутааҕыта Албанияҕа норуоттар икки ардыларынааҕы түһүлгэҕэ үчүгэй тустууну көрдөрөн иккис буолбут Айаал Белолюбскай (57 кг) сэрэбиэй быһыытынан Япония чемпиона Рин Сакамотону кытта көрүстэ. Итиэннэ тэҥҥэ кэриэтэ киирсэ сылдьан иккис түһүмэххэ албаска киирэн биэрэн хотторон кэбистэ.

Салгыы күрэхтэһиигэ дьоппуон уола – Чонг Сон Хаҥҥа (Хотугу Корея) уонна үһүс миэстэни былдьаһыыга Батхуягка (Монголия) хотторон бэһис буолла.

57 кг: 1. Чонг Сон Хан (КНДР), 2. 3. Милад Вализаде (Иран), 3. Рахат Калжан (Казахстан), Мунх-Эрдэнэ Батхуяг (Монголия).

Иккис киһибит Виктор Рассадин бу сырыыга 70 киилэҕэ кытынна. Кини маҥнай олохтоох бөҕөс Заид Меслаҕы (Иордания) очукуонан ыраастык – 11:0 кыайда. Салгыы эргииргэ Иран тахсан эрэр сулуһа, уолаттарга Азия уонна аан дойду кыайыылааҕа Сина Халилины кытта көрүстэ. Бу хапсыһыыга даҕаны биһиги бөҕөспүт тустар таһымынан утарсааччытынааҕар биир төбөнөн ордугун көрдөрөн, 11:2 ахсаанынан эрэллээхтик хотто.

Оттон финалга ким тахсарын быһаарсар тустууга, 65 киилэҕэ аан дойду чемпионатыгар үһүстээх, Азия оонньууларын кыайыылааҕа, Парижтааҕы Олимпиадаҕа бэһистээх Тумур-Очир Тулганы (Монголия) 3:1 ахсаанынан баһыйа тутта.

Дьэ онон, кыайыылаах аатын ким ыларын быһаарсыыга, бу иннинэ Казахстантан кыттар Начын Куулары, аан дойду икки төгүллээх призера дьоппуон Аоягины кыайталаабыт кыргыз Эрназар Акматалиевы кытта хапсыста. Санатан эттэххэ, бу бөҕөстөр 2022 сыллаахха Турцияҕа Яшар Догу кэриэһигэр ыытыллыбыт түһүлгэҕэ көрсөн тураллар. Онно Виктор эрэллээх кыайыыны ситиспитэ. Бу да сырыыга кыайарыгар эрэллээх этибит.

Хапсыһыы оннук да курдук саҕаламмыта. Бастакы түһүмэххэ Виктор эрчимнээхтик туттан-хаптан, биирдэ тиэрэ көтөн, биирдэ атахтаан – 4:0 ахсаанынан хотон испитэ. Ол эрэн, кыргыз сэрэхтээх, уһунньут тустуук буолара эрдэттэн биллэр этэ. Кини үксүгэр хотторон иһэн ситэн ылар үгэстээх. Аоягига 1:6 ахсаанынан хотторон иһэн, бүтэьиккэ ахсааны 8:8 оҥорон кыайыыны ситиспитэ даҕаны ону туоһулуур.

Дьиҥэ, сэрэбиэйи көрөөт, бу ыйааһыҥҥа кыһыл көмүс мэтээл иһин Аояги уонна Рассадин көрсүөхтэрэ диэн сылыктаабытым. Ону ити Акматалиев буккуйан кэбистэ.

Рассадиннаах тустууларыгар төнүннэххэ, иккис түһүмэххэ биир түгэҥҥэ биһиги бөҕөспүт атахха түспүтүн кыргыз хабан ылан ойоҕоһунан хойуоһуннаран кутталлаах түгэҥҥэ туппута, ахсаан 4:2 буола түһэр…

…Чэ, оттон салгыы тустуу хайдах хайысхаламмытын «Дьулурҕан» телеграмҥа каналыгар t.me/dzulurgan баар видеоҕа көрүөххүтүн сөп. Итиннэ өссө Рассадин – Халили, Рассадин – Тулга тустуулара бааллар.

70 кг: 1. Эрназар Акматалиев (Кыргызстан). 2. Виктор Рассадин (Таджикистан), 3. Йосиноке Аояги (Япония), Сина Халили (Иран).

Виктор иккис түһүмэххэ киирэн, били бастакытыгар курдук эрэллээхтик хамсаммакка, хайдах эрэ уларыйан хаалбыт курдук буолбута. Биһиги, түүннэри көрөн, ыалдьан олорор дьон көрүүтүгэр. Онон били кыайан испиппит улам уостан, кэлин тиһэҕэр хотторон таҕыстыбыт. Итиччэ кыайан иһэн хотторуу хаһан баҕарар абалаах…

Хайдах, туох буолбутун тустаах тренеринээн ырытыспыт, дьүүллэспит буолуохтаахтар. Санатан эттэххэ, былырыын Азия чемпионатыгар Рассадин 74 киилэҕэ дьоппуон Кота Такахаши кэнниттэн иккис буолбут эбит буоллаҕына, быйыл 70 кг ыйааһыҥҥа иккистээтэ.

Виктор сааһа 32-тэ. Улахан үөрүйэхтээх бөҕөс. Ол гынан, кини былырыын күһүҥҥүттэн Коркин турнирыгар бастыаҕыттан ыла биирдэ даҕаны күрэхтэһиигэ кыттыбатаҕа охсуулаах буолла дии саныыбын. Быһа холуйан эттэххэ, бу күрэхтэһиигэ кини урукку үөрүйэҕинэн туһунна. Онтукатын күүһэ, сэниэтэ бүтэһиккэ тиийбэтэ.

Петр ПАВЛОВ.