Таһымы намтаппакка, салгыы үрдүккэ дьулуһуохха

Республикатааҕы Медиа-кииҥҥэ, олимпийскай чемпион Роман Дмитриев кэриэһигэр көҥүл тустууга норуоттар икки ардыларынааҕы турнирга сыһыаннаах пресс-конференция уонна Р.М. Дмитриевкэ аналлаах “Первый” диэн саҥа кинигэни сүрэхтээһин буолла.

Тэрээһини, Р.М. Дмитриев аатын сүгэр Олимпийскай эрэл училищетын дириэктэрэ Семен Чердонов иилээн-саҕалаан ыытта. Манна даҕатан эттэххэ, бастакы олимпийскай чемпиоммут кэриэһигэр тустууга күрэхтэһиини кинилэр сүүрэн-көтөн тэрийсэллэр. Ыалдьыттар уонна специалистар сыаналыылларынан, Роман Дмитриев аатынан тустууга күрэхтэһии тэрээһинэ сылтан сыл ахсын тупсан иһэр. Истэргэ үчүгэй! Таһымы уонна тэтими намтаппакка, салгыы үрдүккэ дьулуһуохха.

Семен Сергеевич киирии тылыгар, быйылгы 11-с түһүлгэҕэ кыраныысса таһыттан аҕыс дойду, Россия уон регионуттан бөҕөстөр кытталларын бэлиэтээтэ. Ол курдук, ордук элбэх кыттааччылааҕынан Монголия (25), Беларусь (19) хамаандалара буоларын ыйда. Санатан эттэххэ, күрэхтэһии аҥардас уолаттарга эрэ буолбакка, кыргыттарга эмиэ уон ыйааһыҥҥа ыытыллар.

Итини тэҥэ, быйылгы күрэхтэһии сүрүн судьуйатынан аан дойдутааҕы таһымнаах олимпийскай арбитр Алексей Базулин анаммытын эттэ. Базулин билигин аан дойдуга биир биллэр судьуйа, Тустуу аан дойдутааҕы түмсүүтүн (UWW) инструктора буоларын санатта.

Салгыы тылы ылбыт Саха Республикатын физическэй култуураҕа уонна спорка миниистирин эбээһинэһин толорооччу Гаврил Мохначевскай, саха норуотун чулуу уола – Роман Михайлович Дмитриев сырдык аатын үйэтитии уҕараан ылбакка, сыллата араас өрүттээх үлэ бара турарын эттэ.

–Тустуу ыытыллар сирэ барыта бэлэм буолла, – диир Алексей Базулин. – Барыта ирдэбил быһыытынан. Саха сиригэр тустууну наһаа таптыыллар, тустууну билэллэр, сыаналыыллар. Бэйэлэрин эрэ бөҕөстөрүгэр буолбакка, үчүгэй тустуу туһугар ыалдьаллар. Онон сарсыҥҥыттан үчүгэй тустууну кэтэһэбит, – диэн санаатын үллэһиннэ.

Антонина Софроновна Дмитриева, бүгүҥҥү көрсүһүүгэ Роман Михайлович туһугар саамай ыалдьар дьон мустубутуттан астынарын биллэрдэ. Барыларыгар махтанна. Сахалар, атын омуктарга буолбакка, бэйэбит бэлиэ дьоммутугар сүгүрүйүөхтээхтэрин ыйда. Саҥа тахсыбыт “Первый” диэн кинигэни суруналыыс Мария Сергеева кыайа тутан үчүгэйдик оҥорон таһаарбытын сыаналаата.

Кырдьык, улуу киһибит туһунан бэртээхэй өйдөбүнньүк буолбут – хаартысканан альбом. Санатан эттэххэ, Мария Сергеева бу иннинэ “Наука побеждать” диэн Роман Дмитриев уонна Антонина Дмитриева кинигэлэригэр литературнай редактор быһыытынан үлэлэспитэ. Онон тиэмэтин билэр, үөрүйэхтээх кинигэ оҥорооччу диэххэ сөп. Манна сыһыары тутан эттэххэ, кинигэни Александра Туласынова дизайнер быһыытынан киэргэтэн, оҥорон үлэлэспитин санатар тоҕоостоох.

Салгыы тылы кинигэни хомуйан, бэлэмнээн таһаарбыт Мария Сергееваҕа биэрбиттэригэр, кини сэмэй муҥутаан, бу үлэҕэ элбэх киһи кыттыһан үлэлэспитин эттэ. Хаартысканан альбомҥа фотогравтар Василий Дохунаев, Василий Семенов, Александр Назаров, Валерий Стефанскай уо.д.а. үлэлэрин таһынан суруналыыстар Владислав Коротов, Николай Константинов, Александр Тыллар… суруйууларыттан сыыппаралар-чахчылар, сүбэлэр-амалар туһаныллыбыттарын ааптар бэлиэтээтэ уонна кинилэргэ махталын биллэрдэ.

Республикаҕа спорт биллиилээх тэрийээччитэ, Саха сирин спорка Албан аатын түмэлин салайааччы Михаил Егорович Друзьянов: “Кинигэни үчүгэйинэн сыаналыыбын, табыллыбыт. Бэйэм улахан фотограв да буолбатарбын, сэдэх хаартыскаларбыттан биирдэстэрэ бу кинигэҕэ киирбититтэн сүрдээҕин астынным. Ол – 1971 сыллааҕы ССРС чемпионатыгар Роман, Гавриил Дмитриевтэр, Николай Неустроев чемпионнаан турар хаартыскалара. Түгэнинэн туһанан биири этиэхпин баҕарабын. Мин ити саҥа аһыллыбыт Р.М. Дмитриев аатынан кытылга сүүрээччибин. Онно көрдөххө, сорохтор бу оҥоһуу кимиэхэ анаммытын билбэттэр курдук. Онон манна Роман Михайлович бюһа оҥоһуллан турара буоллар дии саныыбын”, – диэн санаатын үллэһиннэ.

Р.М. Дмитриев аймаҕа, уруккута спорт эйгэтигэр үлэлээбит Юрий Дмитриев, кинигэни оҥорон, бэлэмнээн таһаарбыт дьоҥҥо махтанна уонна бу үлэни хантан, хайдах булуохха, атыылаһыахха сөбүн туһунан, бу күннэргэ элбэх киһи сураһар ыйытыытын биэрдэ.

Онуоха, С.С. Чердонов, кинигэни спорт министиэристибэтэ үбүлээн таһаарбытын, оттон сакаасчытынан Олимпийскай эрэл училищета буоларынан, бу үлэни оҕолорго, студеннарга үөрэтэр пособие быһыытынан туһаныахтаахтарын, онон оскуолаларынан, библиотекаларынан ыытар былааннаахтарын, атыыга тахсыбатын туһунан хоруйдаата.

Көрсүһүү, төһө да аҕыйах киһилээх ыытылыннар, бэрт сэргэхтик барда. Санаа атастаһыыта, ыйытыы-хоруй…

Биллиилээх суруналыыс, фотограв Владислав Петрович Коротов, “Первый” кинигэни салгыы сайыннаран, хаартыскатын элбэтэн, Р.М. Дмитриев тустууга күрэхтэһиилэрин түмүктэрин барытын киллэрэн туран таһаарарга ыҥырда. Онуоха бэйэтин архыыбыттан көмөлөһөргө бэлэмин биллэрдэ. Салгыы кини өссө мас тардыһыыны “мас-рестлинг” диэн ааттаан киэҥ эйгэҕэ тахсарыгар төһүү буолбутун аҕынна. Билигин хаһыс да сылын Р.М. Дмитриев аатынан мас-рестлиҥҥэ Бүтүн Россиятааҕы турнир ыытылларын санатта.

Ити курдук, кырдьык да, биһиги улуу киһибит – Роман Михайлович Дмитриев тустууга күрэхтэһиитин чэрчитинэн тэрээһиннэр үрдүк таһымнаахтык саҕаланнылар. Аны сарсыҥҥыттан – тустуу…

Р.М. Дмитриев кэриэһигэр спортивнай тустууга норуоттар икки ардыларынааҕы турнир сарсын, кулун тутар 8 күнүгэр сарсыарда 10:00 чаастан “Өрөгөй” Спорка бэлэмнэнии киинигэр саҕаланар. Киириитэ – босхо. Финалга тахсар иһин тустуулары уонна быһаарыылаах хапсыһыылары “Саха” национальнай көрдөрөр-иһитиннэрэр хампаанньа “күөх экраҥҥа” көрдөрөр.

Петр ПАВЛОВ.

Ааптар хаартыскаҕа түһэриилэрэ.