Спорт – Күрэс диэн буоллун. Хайдаҕый?

Бүгүн, биир идэлээҕим, спорт суруналыыһа Владислав Коротов ыҥырыытынан сүбэ мунньахха сырыттым. Мунньахпыт, Манчаары Баһылай аатынан “Модун” спорт сахалыы төрүт көрүҥнэрин киинигэр ыытыллыбыта оруннаах. Биһиги, спорт тиэрминнэрин сахалытытыы туһунан кэпсэттибит.

Билэргит курдук, быйылгы сыл Сахабыт сиригэр сүрүн күрэхтэһиитинэн – спорт төрүт көрүҥнэригэр “Манчаары оонньуулара” буолаллар. Маныаха диэри бу биһиги, сахалар бэйэбит Олимпиадабыт диир улахан тэрээһиммит тыла-өһө барыта нууччалыы суруллан, этиллэн кэллэ. Холобур, спорт, многоборье, судьуйа, пресса… диэн тыллар. Онон саатар бэйэлээтэр бэйэбит күрэхтэһиибитигэр, омук уонна нууччалыы тыллартан киирбит тыллары, тиэрминнэри төһө кыалларынан сахалыы тылбаастыахха диэн санаабытын үллэһиннибит.

Дьэ онон дьүүллэһии, санаа атастаһыытын кэнниттэн маннык тыллары анал хамыыһыйа көрүүтүгэр киллэрдибит:

Спорт – күрэс

Спортивная сфера – күрэс эйгэтэ

Спартакиада по национальным видам спорта “Игры Манчаары” – Саха төрүт көрүҥнэригэр “Манчаары оонньуулара”

Спортсмен – күрэсчит

Гиревой спорт – Болгуону анньыы

Многоборье – Дэгит күрэс

Якутское многоборье – Саха дэгит күрэһэ

Северное многоборье – Хотугу дэгит күрэс

Пулевая стрельба – Бэргэн ытыы

Организатор – Тэрийээччи

Судья – Дьүүлдьүт

Волонтер – Үтүө көмөһүт

Волонтерство – Үтүө көмө

Средства массовой информации (СМИ) – Сонуну сырдатар эйгэ

Пресса – Сырдатыы

Журналист – Сырдатааччы.

Бу тыллары Тиэрмин хамыыһыйата бигэргэппитин кэннэ, Манчаары оонньууларын сырдатар эйгэҕэ, Оонньуу угуйуктарыгар туһанарга этии быһыытынан Оонньуу тэрийэр кэмитиэтигэр киллэрэргэ диэн этиилээхпит. Итиэннэ бэс ыйын ортотугар диэри “Спорт тиэрминнэрин кылгас тылдьытын” бэлэмнээн таһаарарга дьулуһабыт.

Ону тыл үөрэхтээхтэрэ, суруналыыстар, спорду таптааччылар туох дии саныыгыт? Эһиги этиилэргитин, санааларгытын күүтэбит. Билигин ырытыһыы, дьүүллэһии кэмэ. Тылбыт – бэйэбит баайбыт буолар. Онно харыстабыллаахтык сыһыаннаһыахтаахпыт, омукпут уратытын көрдөрүөхтээхпит. Олорон биэрбэккэ, сайдыыга талаһыахха. Холобур, ковид, пандемия кэмигэр биһиги эйгэбитигэр, тылбытыгар-өспүтүгэр “хамсык” диэн саҥа тыл киирэн, тута дьон-сэргэ туттуутугар киирбитэ дии. Син ол курдук, бу үөһэ бэриллэр тыллары үөрэтэн, дьүүллэһэн, сөптөөх диэтэххэ, сурукка-бичиккэ киллэриэххэ диэн санаалаахпыт.

Ону дьэ эһиги туох диигит? Санааҕытын үллэстэргитигэр ыҥырабыт.

Петр ПАВЛОВ.

Ааптар хаартыскаҕа түһэриитэ.