Сөҕө-махтайа көрдүлэр

Бэчээт дьиэтигэр баар Саха Суруналыыстыкатын түмэлигэр “Дьулурҕан” хаһыат 25 сылынан анаан туруоруллубут быыстапкаҕа Р.М. Дмитриев аатынан Олимпийскай эрэл училищетын оҕолоро ыалдьыттаатылар.

Сахалыы тылынан тахсар “Дьулурҕан” хаһыат уонна Олимпийскай эрэл училищета уруккуттан, өссө А.А. Филиппов дириэктэрдиирин саҕаттан биир ситимнээхтик үлэлииллэр. Биһиги хаста даҕаны училищеҕа тиийэн оҕолору кытта көрсөн, быыстапка көрдөрөн, оонньуу ыытан, бириис туттаран – эдэр спортсменнары сэргэхсиппит буолуохтаахпыт. Кинилэр бэйэлэрин училищеларын олоҕун туһунан хаһыакка суруйууларын көҕүлээбиппит. Ол сиэринэн, билигин даҕаны “Дьулурҕаҥҥа” Олимпийскай эрэл училищетын сонуннара тиһигин быспакка тахса тураллар.

Бу сырыыга биһиги бу үөрэх кыһатын оҕолорун бэйэбит быыстапкабытыгар ыҥырдыбыт. Спордунан утумнаахтык дьарыктана сылдьар биһиги Сахабыт сирин талааннаах оҕолоро өй-санаа, билии-көрүү өттүнэн сайдыылаах буоллуннар диэн санааттан. Маннык быыстапкаҕа сылдьыы кинилэргэ, син биир, биир эйгэ дьоно буолалларынан, аһаҕас уруок быһыытынан сыаналанар.

Көрсүһүү саҕаланыытыгар “Дьулурҕан” хаһыат редактора Петр Павлов уонна Олимпийскай эрэл училищетын Спорка албан аатын тумэлин салайааччы, ССРС спордун маастара, Саха сирин үтүөлээх тренерэ Николай Константинов кылгас киирии тыл эппиттэрин кэнниттэн быыстапканы көрүү буолла.

Оҕолор быыстапканы эргиччи кэрийэ сылдьан көрөн сөхтүлэр, коллекция уонна тустуу туһунан кэпсээни сэҥээрэн иһиттилэр. Сэрэйдэххэ, билиилэрин-көрүүлэрин хаҥаппыт буолуохтаахтар.

Маннык, оҕолору, ааҕааччылары кытта көрсүһүүлэргэ хаһан баҕарар, Саха спордун историятыгар сыһыаннаах ыйытыктарга биһирэбил бириистээх оонньуу ыытааччыбыт. Онуоха уолаттар көхтөөхтүк кытыннылар. Түмүккэ эдэр бөҕөс Сэмэн Сивцев элбэх ыйытыктарга сөптөөх хоруйу биэрэн кыайыылааҕынан таҕыста. Киниэхэ бириис быһыытынан Георгий Балакшин “Анатомия бокса” диэн кинигэтэ туттарылынна.

Оттон кумааҕы тустууктары үрэн оонньууга аҕыс уол кыттыбытыттан, быһаарыылаах киирсиигэ Саша Корнилов тустууга – Сэмэн Сивцев бөҕөһүн ыраастык быраҕан түһэрэн, бастакы миэстэни ылла. Саша – “Дьулурҕан” үбүлүөйдээх 25 сылыгар оҥоһуллубут мэтээлинэн наҕараадаланан, бэйэтин спорка ситиспит мэтээллэригэр биир ураты мэтээллэннэ диэххэ сөп.

Кэпсэтии кэмигэр биһиги оҕолорго, спорка аҥардас күүс, кыах эрэ буолбакка, өй-санаа, билии-көрүү элбэҕи быһаарарын эттибит. Итиэннэ элбэҕи ааҕа, ырыта сылдьалларыгар баҕардыбыт. Эмиэ бэйэбит үгэспитигэр олоҕуран, өскөтүн сыал-сорук туруорунан ситиһиигэ дьулуһар буоллахха, хайаан даҕаны күннээҕи олоҕу-дьаһаҕы суруна, бэлиэтэнэ сылдьалларыгар сүбэлээтибит. Бэйэбит хаһыаттарбытын биэрдибит. Нууччалыы эттэххэ, бэйэлэрин спорка сыһыаннарын сайыннарар инниттэн “дневник” оҥостуохтаахтарын санаттыбыт. Манна сыһыары тутан эттэххэ, кинилэр быыстапкаҕа сылдьан, биһиги бастакы олимпийскай чемпиоммут Роман Дмитриев суруйбут буочара ырааһын, дьэҥкэтин, чуолкайын көрөн сөхтүлэр.

Эдэр спортсменнар ити курдук “Дьулурҕан” быыстапкатыгар сылдьан элбэҕи билэн-көрөн,  эбиитин илии тутуурдаах, өттүк харалаах астынан тарҕастылар. Түмүккэ, бу көрсүһүү тэриллиитигэр күүс-көмө, тирэх буолбут, Олимпийскай эрэл училищетын дириэктэрин иитэр үлэҕэ солбуйааччы Петр Протодьяконовка махталбытын этэбит.

“Дьулурҕан”.