Роман Дмитриевкэ сүгүрүйүү бэлиэтэ

Бүгүн, сахалартан бастакы олимпийскай чемпион Роман Михайлович Дмитриев төрөөбүт күнэ. Баара эбитэ буоллар, кини 76 сааһын туолуо этэ. Ол да буоллар, саха норуота бэйэтин чулуу уолун хаһан даҕаны умнубат.

Роман Михайлович төрөөбүт күнүгэр хайаан даҕаны киин куоракка Комсомольскай болуоссакка турар пааматынньыгар түмсэн сүгүрүйүү, кэриэстээһин, ахтыһыы, кини өйдөбүнньүгэр сибэкки дьөрбөтүн ууруу үтүө үгэскэ кубулуйда.

Ол сиэринэн быйылгы сүгүрүйүүгэ Саха Республикатын физическэй култуураҕа уонна спорка министрин эбээһин толорооччу Гаврил Мохначевскай, Ил Түмэн депутата, боксаҕа олимпийскай призер Георгий Балакшин, буолаары турар 11-с турнир кылаабынай судьуйата Алексей Базулин, олимпийскай чемпион Павел Пинигин, Р.М. Дмитриев уола Роман Романович, эдэр кэскиллээх тустуук Игорь Матвеев дьон иннигэр тахсан, бэйэлэрин эҕэрдэлэрин эттилэр, кылгас ахтыыларын оҥордулар.

Тэрээһиҥҥэ, Роман Михайлович Дмитриев кэргэнэ Антонина Софроновна, оҕолоро, аймахтара, кини албан аатын киэн туттааччылар, республика спорка общественноһа, Дьокуускай куорат олохтоохторо уонна ыалдьыттара, күрэхтэһэ кэлбит хамаандалар бэрэстэбиитэллэрэ кыттыыны ылан, аатырбыт биир дойдулаахтарын туһунан санаан ыллылар, кинини кэриэстииллэрин, киниэхэ сүгүрүйэллэрин көрдөрдүлэр. Итиэннэ Р.М. Дмитриевкэ анаммыт ырыа доҕуһуолугар, кини өйдөбүнньүгэр сибэкки дьөрбөтүн уурдулар.

Этэргэ дылы, маннык тэрээһиннэр көхтөөхтүк ыытыллалларын, биһиги бастакы олимпийскай чемпиоммут туһунан сырдык өйдөбүл дьон сүрэҕэр-быарыгар баарын, чугаһын тухары – Роман Михайлович Дмитриев аата биһиги сүрэхпитигэр өрүү тыыннаах буолуоҕа.

Р.М. Дмитриев кэриэһигэр спортивнай тустууга норуоттар икки ардыларынааҕы турнир сарсын, кулун тутар 8 күнүгэр сарсыарда 10:00 чаастан “Өрөгөй” Спорка бэлэмнэнии киинигэр саҕаланар. Киириитэ – босхо. Финалга тахсар иһин тустуулары уонна быһаарыылаах хапсыһыылары “Саха” национальнай көрдөрөр-иһитиннэрэр хампаанньа “күөх экраҥҥа” көрдөрөр.

Петр ПАВЛОВ.

Ааптар хаартыскаҕа түһэриитэ.