Роман Дмитриев турнира хайдах ааста?

Ааспыт өрөбүллэргэ, 11-с төгүлүн сүүрбэ биирдэригэр диэри саастаах кыргыттарга уонна уолаттарга олимпийскай чөмпүйүөн Роман Дмитриев кэриэһигэр көҥүл тустууга норуоттар икки ардыларынааҕы турнир бэрт үрдүк таһымҥа ыытылынна. Уопсайа 290-ча бөҕөс тоҕус тас дойдуттан уонна Арассыыйа араас муннугуттан кэлэн кыттыыны ыллылар. Толору састаабы көрдөхпүтүнэ, Узбекистан уонна Монголия хамаандалара аҕалбыттар. 

Сахалартан 97 кг Евгений Аронов, Чувашия бөҕөһүн Арсений Сергеевы баһыйа тутан кыайыылааҕынан таҕыста. Ону тэҥэ, Игорь Матвеев 70 кг кыайыы өрөгөйүн эмиэ биллэ. Юрий Винокуров, Роман Кириллин, Сергей Некрасов, Василий Григорьев, Дьулус Петров, Дамир Явловскай, Ньургун Багынанов эмиэ пъедестал үктэлигэр бэйэлэрин миэстэлэрин булан турдулар.

Кырдьык, бу ааттаммыт уолаттар бэйэлэрин сыраларын-сылбаларын, күүстэрин-уохтарын барытын биэрэн туран мэтээли түөстэригэр кэттилэр. Инникигэ эрэллэрбитин дьарыктыыр, бэлэмниир, эдэрдэргэ Саха сирин сүүмэрдэммит хамаандатын сүрүн тириэнэрэ – Василий Неустроев Японияҕа бара сылдьан, Япония ааттаахтарын, Рей Хигучи курдук уо.д.а  биллэр тустууктары кытта көрсөн, дьарыктарын, уопсай бэлэмнэниилэрин, таһымнарын билэн-көрөн кэлбит эбит. Ол онон сиэттэрэн, бэйэбит бөҕөстөрбүт эмиэ дьоппуоннар туттар ньымаларыттан тугу эмитэ ылынан дьарыктарыгар киллэрбиттэрэ буолуо диэн эрэнэбин.

Уопсайынан, биһиэхэ улахан дьоҥҥо Дмитрий Коркин, юниордарга Роман Дмитриев, оҕолорго Павел Пинигин турнирдара ыытыллаллара саамай сөбүнэн, наадалааҕынан ааҕабын. Тоҕо диэтэр, киһи киһини көрөн үөрэнэр, оттон бэйэтигэр элбэҕи, саҥаны эбинэр, билэр-көрөр, ылынар уонна туһанар. Оҕолортон юниордарга, юниортан улахан дьон таһымыгар тустан уолаттар үүнэн-сайдан, бэйэлэрин дьоҥҥо-сэргэҕэ көрдөрөн, ааттатан кыра-кыралаан тахсан, чыпчааллары дабайан иһэллэр. Кыра оҕо эрдэхтэриттэн холобур оҥосто, көрө улааппыт спортсменнарын кытта кэлин бэйэлэрэ ситэн-хотон, биир көбүөргэ сирэй-сирэйгэ көрсөллөрө эдэрдэриттэн улаатан тахсан, кэлэн иһэллэрин, тустуубут көрүҥ быһыытынан сайдан иһэрин туоһулуур.

Даҕатан эттэхпинэ, убаастыыр убайдаатар убайбыт, сахаттан аан бастакы Олимпиада чөмпүйүөнэ – Роман Дмитриев аатынан күрэхтэһии сылын ахсын үрдүкү таһымҥа ыытылла турарыгар ис сүрэхпиттэн баҕарабын. Бу күрэхтэһииттэн эдэр уолаттар кынаттананнар, улахан көбүөргэ бэйэлэрин дойдуларын чиэһин көмүскүөхтэрэ, ааттарын ааттатыан ааттатыахтара диэн бигэ-турах санаа баар.

«Дьиҥ спортсмен, туох баар киһилии үтүө өрүтүнэн барытынан баһылыахтаах. Ону наадатыгар сөпкө, таба туһанар – ол, спортсмен сатабыла, сыала буолар», диэн Роман Михайлович Дмитриев эппит кынаттыыр этиитинэн суруйуубун түмүктүүбүн.

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет студентката.