Роман Дмитриев туһунан хаартысканан кинигэ

Сахаттан бастакы олимпийскай чемпион Роман Дмитриев туһунан «Первый» диэн ааттаах саҥа кинигэ күн сирин көрдө. Кинигэни – хаартысканан альбом диэххэ сөп. Бу үйэлээх өйдөбүнньүгү суруналыыс Мария Сергеева оҥорон таһаарда.

Кини өссө 2013 сыллаахха бэчээттэнэн тахсыбыт «Наука побеждать» диэн, Роман Михайлович туһунан бастакы улахан кинигэҕэ литературнай редактор быһыытынан үлэлэспит үөрүйэхтээх. Онон, сыһыаннаах киһи оҥорон таһаарбыт кинигэтэ – ылыннарыылаах, таһымнаах диэхпин баҕарабын.

Кинигэ – уһулуччулаах тустуук Роман Михайлович Дмитриев олоҕун кэрчиктэрин саас-сааһынан хаартысканан сырдатар, көрдөрөр, кэпсиир. Көрөргө, ааҕарга судургу, тэттик быһаарыы суруктардаах. Олимпийскай чемпиоммутугар сыһыаннаан элбэх сыыппаралар-чахчылар бэриллибиттэр. Биллэн турар, урукку кэмҥэ улаханнык көстүбэтэх элбэх сэдэх хаартыскалар кинигэни киэргэтэн биэрэллэр.

Кинигэҕэ Дмитриевтэр дьиэ кэргэн, Олимпийскай эрэл училищетын, Чурапчытааҕы спортивнай интернат-оскуола, фотографтар Валерий Стефанский, Александр Назаров, Василий Семенов, уо.д.а. архыыптарыттан итиэннэ көҥүл тустуу историятын туһунан бэчээккэ тахсыбыт суруйуулар хаартыскалара туһанылыннылар.

“Первый” кинигэ Саха Республикатын физическэй култуураҕа уонна спорка министиэристибэтин үбүлээһининэн таҕыста.

Кулун тутар 8-9 күннэригэр үгэс быһыытынан, Роман Михайлович Дмитриев кэриэһигэр көҥүл тустууга эдэрдэргэ норуоттар икки ардыларынааҕы турнир ыытыллар. Ити тэрээһин чэрчитинэн кулун тутар 7 күнүгэр Медиа кииҥҥэ (Бэчээт дьиэтэ)  кинигэ сүрэхтэниитэ буолар. Спорду таптааччылары, бастакы олимпийскай чемпиоммутугар сүгүрүйээччилэри барыгытын бу тэрээһиҥҥэ ыҥырабыт.

Петр ПАВЛОВ.