Петр Павлов быыстапкатын кэрэхсээтибит

Кулун тутар 25 күнүгэр Р.М. Дмитриев аатынан Олимпийскай эрэллэри бэлэмниир училище выпускниктара, саха тылын уонна литературатын учуутала Людмила Николаевна Гаврильева салайааччылаах, Саха Суруналыыстыкатын түмэлигэр ыалдьыттаатыбыт.

Бэчээт дьиэтигэр «Дьулурҕан» хаһыат 25 сыллаах үбүлүөйүгэр анаан, биллиилээх спортивнай суруналыыс Петр Семенович Павлов быыстапката турбут.

Петр Павлов өр кэмнээх үлэтин түмүктэрин көрдүбүт. Кыра кылааска үөрэнэ сылдьан аан бастаан «Бэлэм буол» хаһыакка хартыына туһунан суруйбут эбит, онтон саҕаламмыт кини суруналыыстыкаҕа үлэтэ. Оччолортон тустууну олус интэриэһиргиир этим диир, хаһыаттартан кырыйан араас ыстатыйалары мунньар идэлэммит.

Коллекция быыстапката киэҥ. Манна кинигэлэр, сурунааллар, хаартыскалар, значоктар, кубоктар, наҕараадалар көрдөрүүгэ бааллар.

Саха спордун историятыгар аналлаах викторинаҕа Алексей Максимов кимиэхэ да иннин биэрбэтэ. Киниэхэ ааптар биһиги олимпиецтарбыт хаартыскаларын бэлэх уунна. Кумааҕы тустууктарынан оонньууга Игорь Матвеев кыайыы өрөгөйүн биллэ уонна «Дьулурҕан» үбүлүөйдээх мэтээлин иилиннэ.

Быыстапка туһунан санаалар:

Игорь Матвеев: “Петр Семенович тус олоҕун, хайдах суруйан саҕалаабытын кэпсээтэ. Кини ханна сылдьыбыт сириттэн сувенир аҕалар, хаартыска түһэрэн мунньар эбит. Кырдьык, оччоҕо киһиэхэ саныыра элбэх буолар, кэлин ылан көрдөххүнэ, хараххар ол кэм, түгэн барыта арылла түһэр. Экспонаттары мунньан саҕалыырга бу быыстапка биһиэхэ холобур буолла. Петр Семеновичка быыстапка тэрийбитигэр, биһиэхэ билиһиннэрбитигэр махтанабын. Уолаттар бары кэрэхсээтибит, элбэҕи биллибит. Күрэхтэһии тэрийэн, кумааҕы тустууктарынан кииристибит. «Дьулурҕан» спорт хаһыата сайда турдун, куруук элбэх ааҕааччылаах буоллун”.

Эрэл Леонтьев: “Саха спордугар бэйэтин кылаатын киллэрэ сылдьар Петр Семенович быыстапка туһунан киһи болҕомтотун тардар гына кэпсээтэ. Интэриэһинэй, сэдэх хаартыскалар бааллар. Коллекция өссө кэҥии турдун. Ааҕааччылара, көрөөччүлэрэ, кини үлэтиттэн сиэттэрэн, спорду сэҥээрэр, чөл олохтоох буоллуннар”.

Ринат Троев: “Коллекцията киэҥин сөҕө-махтайа көрдүм, олус үчүгэйдик муспут дии, киһи көрөн астынар. Быыстапкаҕа ордук автографтары сөбүлээтим. Иван Ярыгин, Адлан Вараев курдук биллиилээх спортсменнар Петр Семеновичка истиҥ тыллары суруйбуттар.

Алексей Максимов: “Быыстапка чахчы интэриэһинэй. Петр Семенович араас сылларга муспут коллекциялара, суруйбут үлэлэрэ элбэх. Коллекция малын көрдүҥ да, киһи өйдөөн кэлэр буоллаҕа, ханна буолбутай, туох буолбутай… Викторина кыайыылааҕа буоллум. Кумааҕынан тустууну оскуолаҕа оонньуур этибит, финалга диэри кииристим”.

Ян Афанасьев: “Бэйэм боксанан дьарыктанабын, чугас доҕотторум тустууктар, тустууну эмиэ интэриэһиргиибин. Суруналыыстыка түмэлигэр тиийэн билбэппин биллим, көрдүм. «Дьулурҕан» хаһыат үүнэ-сайда, чэчирии турдун”.

Данил МОХНАЧЕВСКАЙ, 4-с куурус устудьуона.

Людмила ГАВРИЛЬЕВА хаартыскаҕа түһэриилэрэ.