Нууччалыы тыллары сахалыы тиэрмин быһыытынан туттуу

Биллэрин курдук, быйыл сайын сахалар Олимпиадабыт диир биир саамай астына, дуоһуйа кэтэһэр күрэхтэһиибит, Таатта ытык-мааны сиригэр-уотугар «Манчаары оонньуулара» ыытыллыахтаах.

Онно бу сыллар тухары, сахалар бэйэбит төрүт көрүҥнэрбитин ыытыы сиэрэ-туома, суруйуу бары кэриэтэ нууччалыы тылынан этиллэн кэллэ диэн тоһоҕолоон, бэлиэтээн этэбит.

Дьэ, онтон быйыл анал дьүүллэһии, санаа атыстаһыытын кэнниттэн, анал хамыыһыйа нууччаттан, омук тылларыттан киирбит тыллары сахалыы тылбаастаата.

Спорт – күрэс

Спортивная сфера – күрэс эйгэтэ

Спартакиада по национальным видам спорта “Игры Манчаары” – Саха төрүт көрүҥнэригэр “Манчаары оонньуулара”

Спортсмен – күрэсчит

Гиревой спорт – Болгуону анньыы

Многоборье – Дэгит күрэс

Якутское многоборье – Саха дэгит күрэһэ

Северное многоборье – Хотугу дэгит күрэс

Пулевая стрельба – Бэргэн ытыы

Организатор – Тэрийээччи

Судья – Дьүүлдьүт

Волонтер – Үтүө көмөһүт

Волонтерство – Үтүө көмө

Средства массовой информации (СМИ) – Сонуну сырдатар эйгэ

Пресса – Сырдатыы

Журналист – Сырдатааччы.

Онон, бу тыллары Тиэрмин хамыыһыйата чуолкай бигэргэттэҕинэ, оччотугар Манчаары оонньууларын сырдатыыга бу тыллары сөпкө саҥаран, туһанан күрэс хаамыытыгар, эйгэтигэр булгуччу киирэрэ буоллар диэн суруналыыстар, айар-тутар эйгэҕэ сылдьар дьон сүрдээҕин баҕарабыт, бэйэбит онно үлэлэһэбит даҕаны.

Суруналыыстар бу саҥа киирэн эрэр тыллары элбэхтэ ыстатыйаларбытыгар суруйан киллэрдэхпитинэ, күрэсчиттэр бэйэлэрэ даҕаны, күрэскэ бука бары сыһыаннаахтар, кыттыгастаахтар күннээҕи олохпутугар, саҥарар саҥабытыгар элбэхтэ туттар буоллахпытына, норуоппут, сахабыт дьоно-сэргэтэ эмиэ холобур ылан, тыллары сахатытан таба саҥарарга талаһыа уонна дьулуһуо эбиттэрэ буолуо дии саныыбын.

Уопсайынан даҕаны, төрөөбүт төрүт, ийэ тылбыт сүтэн, симэлийэн хаалбатын туһугар эдэр кэнэҕэски ыччат, аҕам саастаах дьон даҕаны бары туруулаһабыт, тылбыт инникитин хайдах дьылҕанарыттан долгуйабыт. Сахабыт тылын кэскилэ, сайдар саҕаҕа хас биирдиибититтэн олус тутулуктааҕын умнумуоххайыҥ, сүрэхпитигэр-быарбытыгар умнуллубаттыы хатыаххайыҥ диэн барыгытын ыҥырабын!

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет студентката.