Күрэхтэһии тиһигин быспакка ыытыллар

Бороҕоҥҥо, Н.Н. Тарскай аатынан Спорт дыбарыаһа үлэҕэ киириэҕиттэн олохтоохтор эттэрин-хааннарын чэбдигирдииттэн саҕалаан араас таһымнаах күрэхтэһиилэр, атын даҕаны көхтөөх спортивнай-култуурунай тэрээһиннэр быыстала суох ыытыллаллар.

Спорт дыбарыаһын дириэктэринэн, бу иннинэ хас да сыл улуус спорка тэрилтэтин салайбыт Константин Давыдов үлэлиир. Киниттэн кылгастык дыбарыас үлэтин билиһиннэрэригэр көрдөстүбүт.

-Күрэхтэһии нэдиэлэ аайы ыытыллар, – диир Константин Васильевич. – Аҥардас быйылгы сылга киирэн баран, И.А. Халдеев кэриэһигэр хапсаҕайга республикатааҕы турнир, саха многоборьетыгар Дыгын оонньуутугар сүүмэрдиир күрэхтэһии, чэпчэки атлетикаҕа С.М. Татаринов сырдык аатыгар республикатааҕы турнир, Мүрү нэһилиэгин түөлбэлэрин уонна үөрэх тэрилтэлэрин спартакиадалара буоллулар. Билигин СР үтүөлээх тренерэ, ССРС спордун маастара Константин Бурцев бирииһигэр боксаҕа Саха сирин аһаҕас күрэхтэһиитэ үгэннээн ыытылла турар. Манна 250-чэ эдэр боксёрдар Бурятияттан тиийэ кэлэн күөн көрсө сылдьаллар.

Кэлэр ыйга, муус устар 4-5 күннэригэр норуоттар икки ардыларынааҕы кылаастаах спорт маастара Афанасий Заболоцкай бирииһигэр көҥүл тустууга республика түһүлгэтэ, салгыы Александр Бурнашев – Аачык кэриэһигэр кыра саастаах уолаттарга биирдиилээн бастыыр иһин күрэхтэһии, «Уус Алдан маастардара» диэн атах оонньуутугар күрэхтэһии, «Хоро Бэргэн» диэн оҕунан ытыыга күрэс… буолаллара былааннанар.

Ити курдук, бу кыһыҥҥы-сааскы кэмнэргэ дыбарыаспыт үлэтэ оргуйан олорор. Араас таһымнаах күрэхтэһиилэри таһынан, спорт көрүҥнэринэн эрчиллиилэр, дьарыктар тиһигин быспакка ыытыллаллар. Егор Ноговицын дьарыктааһынынан волейболист оҕолорбут республика күрэхтэһиитигэр бэлэмнэнэн, анал үөрэтэр-эрчийэр түмсүүгэ сырыттылар. Күннэтэ чэпчэки атлетикаҕа, боксаҕа, оҕунан ытыыга, буулдьанан ытыыга, мас-рестлиҥҥэ, аэробикаҕа, остуол тенниһигэр, дуобакка-саахымакка секциялар үлэлииллэр. 2024 сыл түмүгүнэн ааҕыынан барыта 1096 оҕо дьарыктанар. Кинилэри 35 тренер эрчийэр. Маны тэҥэ тренажернай саала үлэлиир.

Биһиэхэ аҥардас спортсменнар эрэ сылдьар буолбатахтар, олохтоох нэһилиэнньэ эмиэ көхтөөхтүк сылдьан дьарыктанар. Ол курдук, олохтоохтор сарсыарда кэлэн манежка сүүрэллэр, эттэрин-хааннарын эрчимирдэллэр, киэһэтин мээчиктииллэр, тренажернай саалаҕа дьарыктаналлар.

Дьэ онон, урут анал саалата суох олорбут Бороҕон олохтоохторо физкултууранан-спордунан дьарыктанан абыраннылар. Буолар күрэхтэһиилэри, тиийэн кэлбит бастыҥ спортсменнары илэ көрөн сэргэхсийдилэр.

Петр ПАВЛОВ.

Виктор ЭВЕРСТОВ хаартыскаҕа түһэриитэ.