“Хаар-хаар барахсан!” күрэхтэһиигэ

Кулун тутар 23 кунугэр “Доҕордоһуу” түмэлигэр “Хаар-хаар барахсан!” диэн оҕолорго аналлаах республикатааҕы күрэхтэһии буолан ааста.

Былыр-былыргыттан бу үлүгэрдээх томороон тымныы дойдуга саха оҕото барахсан ыраас хаар устун сүүрэн-көтөн, күөлэһийэн, тоҥуу хаарга буккуллан аҕай кэллэҕэ. Ол үгэһи сөргүтэн биһиги түмэлбитин төрүттэспит, уһун кэмҥэ салайбыт, элбэх оҕону ииппит-үөрэппит, биһиги ийэбит, учууталбыт, наставникпыт Раиса Реасовна Кулаковская толкуйдаабыт, оҕо-аймах сөбүлүүр, кэтэһэр бырааһынньыга бэлиэр 25-с төгүлүн ыытылынна.

Дьэ, хара сарсыардаттан түмэлбит кымырдагас уйатын тоҕо тардыбыт курдук дьонунан туолла, оҕо-уруу дьоллоох саҥата чугдаарда, күнэ да чаҕылыйан, анаабыт курдук сааскылыы сандаарда! Күрэхтэһиигэ Суотту, Сыырдаах, Уһун Күөл, Чараҥ, Уус Алданнааҕы техникум уонна Дьокуускай куораттан хас да хамаанда аат ааттаан кэлбиттэр.

Манна Дьокуускай куораттан 11 оҕолоох Тимофеевтар дьиэ-кэргэн  бэйэлэрин хамаандаларын туруорбуттара кэрэхсэбиллээх буолла. Аны култуура колледжын студеннара куруук да буоларын курдук, тэрээһиммитин алыс да  киэргэттилэр, таһымын да үрдэттилэр. Бу өссө үйэ чиэппэрин анараа өттүгэр тэриллибит республикатааҕы күрэхтэһиини судьуйалар: Айсен Герасимов, Айсен Копырин, Иннокентий Алексеев, Андрей Сыроватскай уонна Пётр Лугинов иилээн-саҕалаан, ханан да дьиэк биэрбэт гына ыыттылар.

Түмүгэр, ыһыылаах-хаһыылаах, хатыһыылаах күрэхтэһиигэ кыра саастаах оҕолорго “Мохсоҕол” (Суотту орто оскуолата,  хапытаан Харайбатов Денис ) бастакы, “Ньукулай ыччаттара” (Уһун Күөл орто оскуолата, хапытаан Турантаев Саша) иккис, “Звёздочка” (ассоциация приёмной семьи, Дьокуускай) үһүс миэстэни, оттон улахан саастаах оҕолорго бастакы миэстэни “Цунами” (техникум), иккиһи “Майаҕатта” (Сыырдаах), үсүһү “Толлуман” (Суотту) хамаандалара ыланнар,  түөстэригэр мэтээл кэттилэр, кубок, диплом тутан үөрүү өрөгөйүн биллилэр.

Ол кэннэ саамай кытаанах көрүҥҥэ – 194 үктэллээх кирилиэс устун үрдүк мырааҥҥа сүүрэн тахсыыга Колодезникова Алиса (Сыырдаах) уонна Сергеев Андрей (Суотту) тэҥнээхтэрин булбатылар. Онон өр кэмҥэ умнулла сылдьыбыт “Хаар-хаар, барахсаммыт!” дьону иккистээн түмтэ, уота хаттаан умайда. Түмүгэр кэлбит ыалдьыттар, ыалдьааччылар, кыттааччылар, тэрийээччилэр “Победила Дружба!” диэтибит уонна эһиил баччаҕа эмиэ көрсүөх буолан үөрэ-көтө тарҕастыбыт.

АЙЫМ.