Финалга түөрт уолбут таҕыста

Олимпийскай чемпион Роман Дмитриев кэриэһигэр көҥүл тустууга норуоттар икки ардыларынааҕы XI турнир бастакы күнэ түмүктэннэ.

Сарсыардаттан «Өрөгөй» Спорка бэлэмнэнии киинигэр үс көбүөрүнэн ыытыллыбыт киирсиилэр кэннилэриттэн финалга кимнээх тахсыбыттара билиннэ. Ол курдук, Саха сирин хамаандатыттан Роман Кириллин (57 кг), Юрий Винокуров (61 кг), Игорь Матвеев (70 кг) көрсүбүт утарсааччыларын кыайталаан, быһаарыылаах хапсыһыыга таҕыстылар.

Оттон 97 кг ыйааһыҥҥа кыттааччы аҕыйах буолан, тустуу эргиир систиэмэтинэн ыытылынна. Манна Евгений Аронов түөрт утарсааччытын кыайа тутта. Аны кини сарсын монгол Тумэнжаргал Лхагвадоржу кытта киирсэрэ хаалла. Бу тустууга кыайдаҕына, Аронов бастыыр.

Сарсын «уоскутар» бөлөххө элбэх бөҕөспүт кыттар. Оттон Юрий Винокуров (57 кг), Максим Григорьев (61 кг), Василий Григорьев (61 кг), Юрий Старостин уонна Владимир Басов (иккиэн 79 кг), Милан Саморцев уонна Сахаян Абрамов (иккиэн 92 кг) – турнир боруонса мэтээлин иһин тустуохтара.

Биир эрэммит бөҕөспүт – 65 киилэҕэ Дальнай Восток федеральнай уокуругун улахан дьоҥҥо чемпиона Эдуард Попов финал чиэппэригэр бэйэтин киһитэ Василий Григорьевка 2:7 ахсаанынан хотторон кэбистэ. Эмиэ биир тарбахха баттаабыт бөҕөспүт Мохначевскай (57 кг) бурят Пурбо Эрдынеевка сабырыйтарда. Оттон Сергей Некрасов (65 кг) финал чиэппэригэр мөккүөрдээх хапсыһыыга Демьян Макаровка (Казань) хотторуулааҕынан ааҕылынна.

Атын кыттааччылартан – узбектар үчүгэй тустууну көрдөрдүлэр. Кинилэр бары бэйэлэрин дойдуларын чемпионнара, Азия күрэхтэһиитин призердара эбит. Узбектартан түөрт уол финалга таҕыста.

Мэтээл иһин тустуулар сарсын киэһэ, күрэхтэһиини үөрүүлээхтик аһыы кэнниттэн буолуохтара.

Финалга көрсүөхтэрэ:

57 кг: Пурбо Ердынеев (Бурятия) – Роман Кириллин (Саха сирэ)

61 кг: Юрий Винокуров (Саха сирэ) – Кирилл Бахметеев (Чувашия)

65 кг: Санжарбек Рустамбеков (Узбекистан) – Демьян Макаров (Татарстан)

70 кг: Сунгкар Сейдахмет (Казахстан) – Игорь Матвеев (Саха сирэ)

74 кг: Адилет Акылбеков (Кыргызстан) – Нурдаулет Сейлбеков (Казахстан)

79 кг: Джорулло Абдуфаттохов (Узбекистан) – Амгалан Цыдеев (Бурятия)

86 кг: Эльнур Акыбаев (Кыргызстан) – Иван Федоров (Кемерово)

92 кг: Баярбаатар Эрдэнэмунх (Монголия) – Шерзод Поёнов (Узбекистан)

125 кг: Сулде Донгак (Кыргызстан) – Элдорбек Хасанов (Узбекистан).

Сарсын сарсыарда 10:00 чаастан «уоскутар» бөлөх киирсиилэрэ уонна кыргыттар тустуулара буолуоҕа. Оттон программа быһыытынан 16:00 чаастан – күрэхтэһиини үөрүүлээхтик аһыы. Дьэ ол кэнниттэн бириистээх миэстэлэр иһин хапсыһыылар ыытыллыахтара, кыайыылаахтары наҕараадалыахтара.

Бука барыгытын «Өрөгөйгө» ыҥырабыт. Киириитэ – босхо.

«Дьулурҕан».