«Дьулурҕан» бирииһигэр тустуу

Кулун тутар 13-14 күннэригэр Уус Алдан улууһун киинигэр Бороҕоҥҥо, «Дьулурҕан» хаһыат бирииһигэр 2011-2012 сс. төрөөбүт уолаттарга көҥүл тустууга улуустааҕы күрэхтэһии тэриллэр.

Күрэхтэһии Н.Н. Тарскай аатынан Спорт дабарыаһыгар буолуоҕа. Уолаттар уон ыйааһыҥҥа ким күүстээҕин быһаарсыахтара. Ыйааһыннарынан кыайыылаахтарга уонна иккис-үһүс буолбуттарга тустаах өйдөбүнньүктэр, мэтээллэр, харчынан бириистэр туттарыллыахтара.

Бу тэрээһини улуустааҕы физическэй култуура уонна спорт управлениета (начаалынньык Е.П. Алексеев), оҕо спортивнай оскуолата (дириэктэр М.В. Слепцов) иилээн-саҕалаан ыыталлар. Күрэхтэһии тэриллиитигэр «Саха Бэчээт» (генеральнай дириэктэр Н.М. Стручкова, кини сүбэһитэ В.И. Бочонина), Саха Республикатын Суруналыыстарын сойууһа (бэрэссэдээтэл О.О. Марков, бэрэссэдээтэли солбуйааччы Г.А. Бочкарева) күүс-көмө буолаллар.

Итини тэҥэ Россия Суруналыыстарын Саха сиринээҕи салаата, «Дьулурҕан» хаһыаты төрүттээбит биллиилээх суруналыыс Г.А. Бочкарева, Саха сирин Спорка Албан аатын түмэлин салайааччыта М.Е. Друзьянов, «Забота-Арчы» хаһыат (сүрүн редактор В.В. Эверстов), «Көмүөл» кинигэ кыһатын салайааччыта Б.И. Павлов, хапсаҕай маастара Станислав Афанасьев көҕүлээһининэн Khapsagai_sakha team01 бөлөх, «Дьулурҕан» хаһыат көмөлөһөөччүлэрэ Уйбаан Уйгуров (Хаҥалас), Гаврил Скрябин (Майа), «Дьулурҕан» хаһыат редактора П.С. Павлов аймахтара, уо.д.а. бэйэлэрин бириистэрин анаатылар.

Кыайыылаахтар үктэллэригэр тахсан биһирэммиттэри тэҥэ, күрэхтэһии түмүгүнэн «Түһүлгэ чулуу бөҕөһө», «Кэрэ хапсыһыы иһин», «Бастыҥ албаһын иһин», «Эдэр кэскиллээх бөҕөс», «Бастыҥ көрдөрүүлээх дьарыктааччы», «Бастыҥ дьүүллээччи» диэн анал бириистэр оонньонуохтара.

Дьэ, онон уолаттар көбүөргэ туох баар кыахтарынан, туохха үөрэммиттэринэн тусталларыгар, бэйэлэрин көрдөрөллөрүгэр баҕарыаҕыҥ. Этэргэ дылы, ким күүстээх, ким үчүгэй бэлэмнээх – ол кыайдын!

Бу тэрээһин «Дьулурҕан» 25 сылыгар уонна бу хаһыат редактора, Саха Республикатын үтүөлээх суруналыыһа, Уус Алдан улууһун бочуоттаах олохтооҕо Петр Павлов 60 сааһыгар ананан ыытыллар.

«Дьулурҕан».