“Доҕордоһуу” түмэлгэ кыһыны атаардыбыт

Аҕыс сарадахтаах аламай маҥан күммүт сандаарыччы тыгыыта “Доҕордоһуу” түмэлигэр “Кыһыны атаарыы” бырааһынньыга бэрт көхтөөхтүк буолан ааста.

Бу күн түмэлбитигэр ыраахтан-чугастан кэлбит ыалдьыттар тоҕуоруһа муһуннулар, оҕо-аймах сыыртан сырылыы, хаҥкылыы, сыарҕалаах атынан, хайыһардаах тимир көлөнөн хатааһылыы, эр дьоннор уот оттон, үтэһэҕэ эт үөлэ охсон сырылатан-бырылатан бардылар. Оо, күөх халлааммыт бу ырааһыын, үрүҥ күммүт бу сырдыгыын, салгына ыраас да ыраас, тула өттүбүт хаар да хаар… Киһи эрэ дууһата сылаанньыйар түгэнэ!

Бу дьон-сэргэ кэтэһэр, сөбүлүүр бырааһынньыгын Өксөкүлээх Өлөксөй аатынан норуоттар доҕордоһууларын дьиэтин коллектива (дириэктэр А.Н. Корякина), былыргы дьаамсыктар сыдьааннара, Саха Республикатын култууратын үтүөлээх үлэһитэ Ирина Стрекаловская салайар “Ямщицкие бубенцы” ансаамбыла, аҕыйах ахсааннаах эбээн омугун этно-ырыаһыта Татьяна Соросова – Балаганчик, ырыаһыттар Елизавета Глаголева уонна Валерий Сергеев дуэттара киэргэттилэр.

Ол кэннэ улуу нуучча норуотун сиэринэн кулуһун чуучуланы уматан, хаатыҥканы ыраахха кыыратан, хороводтаан, күрэхтэһэн, кыттааччылыын-көрөөччүлүүн, оҕолуун-улаханныын бары да дуоһуйан тарҕастыбыт.

Көрсүөххэ диэри кырыа кыһын, эҕэрдэ буоллун  сандал саас!

АЙЫМ.