Быһаарыылаах хапсыһыыга үс уолбут таҕыста

Бурятия киин куоратыгар 24-гэр диэри саастаахтарга спортивнай тустууга (кыргыттар уонна уолаттар) Дальнай Восток федеральнай уокуругун күрэхтэһиитэ ыытылла турар. Бүгүн барыллааһын уонна финалга тахсар иһин тустуулар буоллулар.

Дьэ, барыллааһын хапсыһыылар кэннилэриттэн уолаттарбыт ситиһиилээх тустууларын көрөн-истэн, сэргэхсийэн, омуммутугар өрүкүнэйэ түспүппүт баара… Уолаттарбытыгар эрэммиппит даҕаны.

Эрдэ эппиппит курдук, бу күрэхтэһиигэ, соторутааҕыта Сунтаарга ыытыллыбыт Н.Н. Тарскай аатынан улахан дьоҥҥо Саха сирин көҥүл тустууга биирдиилээн уонна хамаанданан бастыыр иһин чемпионатын кыайыылаахтара: Кэскил Семенов (57 кг), Артём Слепцов (61 кг), Юлиан Григорьев (65 кг), Олег Фомин (74 кг) кытыннылар. Кинилэргэ улахан итэҕэл сүктэриллибитэ. Ол эрэн, Слепцов уонна Фомин эрэ бастакы миэстэ иһин хапсыһыыга таҕыстылар. Оттон Семенов уонна Григорьев боруонса мэтээл иһин тустар буоллулар.

https://vk.com/wall394050533_2670

PS: уолаттарбыт биирдиилээн тустууларын «Дьулурҕан» хаһыат телеграмҥа каналыгар t.me/dzulurgan көрүөххүтүн сөп.

Бастакы миэстэ иһин киирсиэхтэрэ:

57 кг Шагдуров Баир (Бурятия) – Эрдынеев Пурбо (Бурятия)

61 кг Слепцов Артем (Саха сирэ) – Гонжапов Бэлигто (Бурятия)

65 кг Балтуев Федор (Бурятия) – Борогшонов Эрдэм (Бурятия)

70 кг Базаров Элбэкто (Бурятия) – Бадмаев Руслан (Бурятия)

74 кг Гармаев Сандан (Бурятия) – Фомин Олег (Саха сирэ)

79 кг Бодиев Тумэн (Бурятия) – Куприянов Дмитрий (Бурятия)

86 кг Каркунов Жамсаран (Бурятия) – Судаков Максим (Бурятия)

92 кг Жигжитов Аюр (Бурятия) – Бальжинимаев Арсалан (Бурятия)

97 кг Жибалов Илья (Бурятия) – Эрхитуев Кирилл (Бурятия)

125 кг Санжиев Айдар (Бурятия) – Иванов Даниил (Саха сирэ).

Көрөргүт курдук, уон ыйааһынтан – биһиэннэрэ үһүгэр эрэ таҕыстылар. Уолаттарбыт салгыы хайдах кыттыахтарай? Ылан көрдөххө, утарсааччылара ааттарынан-суолларынан, инники ситиһиилэринэн туох да уратылара суох. Төттөрүтүн, биһиги уолаттарбыт үөрүйэхтээх, бэйэлэрин холлоругар син ситиһиилээх курдуктар. Нууччалыы эттэххэ, бу хапсыһыыларга «фавориттар» диэххэ сөп. Ол эрэн, ким үчүгэй бэлэмнээҕин көбүөр көрдөрүө. Бүгүн, Станислав Свинобоев (74 кг) финалга тахсыыга олох кыайар киһитигэр – Гармаевка хотторон кэбистэ дии. Ол аата, бүгүҥҥү турук, эрчиллии быһаарар.

Бу күрэхтэһиигэ уолаттар эрэ буолбакка, кыргыттар эмиэ кытталлар. Онуоха биһиэннэриттэн 50 киилэҕэ Александра Копылова үчүгэй тустуулары көрдөрөн, кыһыл көмүс мэтээл иһин киирсиэҕэ.

Оттон финалга тахсар иһин хапсыһыыларга хотторбут: Егор Явловскай (61 кг), Уйгулаан Протодьяконов (70 кг), Арсен Кононов (61 кг), Дмитрий Куприянов (79 кг), Роман Николаев (86 кг), Виталий Ефремов (92 кг), Евгения Огородникова (62 кг) боруонса мэтээл иһин тустуохтара. Өссө Лилиана Рожина (72 кг) балаһыанньата куһаҕана суох.

Мэтээл иһин тустуулар сарсын күн иккис аҥарыгар буолуохтара.

Буряттар бу күрэхтэһиигэ үчүгэйдик бэлэмнэммиттэр. Оннук да буолуохтаах этэ. Аны сайын, атырдьах ыйын саҥатыгар бэйэлэрин дьиэлэригэр-уоттарыгар Улан-Удэ куоракка бу саастаахтарга Россия күрэхтэһиитэ ыытыллыахтаах. Онно сирэйдэринэн сиргэ баран түспэт гына оҥостон бэлэмнэммиттэр диэххэ сөп.

Петр ПАВЛОВ.