Бувайсар Сайтиев уонна сахалар

Көҥүл тустууга үс төгүллээх олимпийскай чемпион, албан аатырбыт тустуук Бувайсар Сайтиев Дьокуускайга үстэ кэлэ сылдьыбыта.

Ол курдук, 1997 сыллаахха «Кыайыы 50 сыла» Спорт дыбарыаһыгар ыытыллыбыт, Р.М. Дмитриев Олимпиадаҕа бастаабыта 25 сылыгар анаммыт аһаҕас турнирга кэлэн бастаабыта. Онно 76 киилэҕэ кини барыллааһын күрэхтэһиигэ Святослав Татариновы, оттон финалга Григорий Массаевы кыайбыта. Иккиһигэр, 2002 с. “Туймаада” стадиоҥҥа буолбут РФ чемпионатыгар 74 кг ыйааһыҥҥа финалга дагестанец Магомед Исагаджиевка сабырыйтаран, иккис буолбута. Үһүс кэлиитэ 2016 с. “Өрөгөй” Спорка бэлэмнэнии киинигэр тэриллибит РФ чемпионатыгар бочуоттаах ыалдьыт быһыытынан этэ.

Саха бөҕөстөрүттэн Бувайсар, билигин Өймөкөөн улууһун баһылыгынан үлэлиир, СР көҥүл тустууга сүүмэрдэммит хамаандатын кылаабынай тренеринэн үлэлээбит спорт маастара Александр Оконешниковы кытта 2007-2008 сс. үстэ тустубута. Иккитэ – Красноярскайга Д.Г. Миндиашвили бирииһигэр Бүтүн Россиятааҕы турнирыгар уонна биирдэ Санкт-Петербурга ыытыллыбыт РФ чемпионатыгар.

Сайтиев кинилиин тустарын сөбүлүүр этэ, хапсыһыылара хаһан баҕарар сытыытык, тыҥааһыннаахтык бараллара. Ол иһин, Пекиннээҕи Олимпиада иннинэ Россия сүүмэрдэммит хамаандатын Красноярскайга буолбут анал үөрэтэр-эрчиллэр түмсүүтүгэр, Бувайсар биһиги Александрбытын сбордарга спарринг-партнер быһыытынан илдьэ сылдьыбыта.

Бувайсар Сайтиев сахалартан өссө 2003 сыллаахха Красноярскайдааҕы ШВСМ аһаҕас чемпионатыгар Семен Семеновы кытта тустан кыайан турардаах.

Уһун уугар сымнаҕастык утуй, номоххо киирбит Улуу тустуук. Биһиги эйигин хаһан да умнуохпут суоҕа.

Петр ПАВЛОВ.