Барыгытын тустууга ыҥырабыт!

Кулун тутар 7-10 күннэригэр Дьокуускайга, ССРС спордун үтүөлээх маастара уонна үтүөлээх тренерэ, олимпийскай чемпион Роман Михайлович Дмитриев кэриэһигэр 2005-2007 сс. төрөөбүт спортсменнарга норуоттар икки ардыларынааҕы XI турнир ыытыллар.

Бу күрэхтэһии – РФ Спорка министиэристибэтин, РФ спортивнай тустууга федерациятын, СР физическэй култуураҕа уонна спорка министиэристибэтин, СР спортивнай тустууга федерциятын, Р.М. Дмитриев аатынан Олимпийскай эрэл училищетын көҕүлээн, тэрийэн уонна бэлэмнээн ыытыыларынан тэриллэр.

Күрэхтэһии “Өрөгөй” Спорка бэлэмнэнии киинигэр буолуоҕа. Түһүлгэҕэ кыраныысса таһыттан, Россия сүүмэрдэммит хамаандатыттан, дойду регионнарыттан уонна биһиги реcпубликабытыттан эдэр спортсменнар күөн көрсүөхтэрэ. Билиҥҥитэ уонча дойду кыттарын биллэрдэ: Азербайджан, Армения, Беларусь, Венгрия, Индия, Монголия, Таджикистан, Турция, Казахстан, Кытай, Кыргызстан, Узбекистан, Соҕуруу Корея.

Уолаттар – 57, 61, 65, 70, 74, 79, 86, 92, 97, 125 кг, оттон кыргыттар – 50, 53, 55, 57, 59, 62, 65, 68, 72, 76 кг тустуохтара.

Хас ыйааһын аайы кыайыылаахтар уонна иккис-үһүс миэстэлээхтэр туһааннаах дипломнарынан, мэтээллэринэн итиэннэ харчынан наҕараадаланыахтара. Ол курдук, бастаабыт киһиэхэ – 35, иккистээбиккэ 25 уонна үһүстээбиттэргэ – 15-тии тыһ. солк. харчынан бириистэр туттарыллыахтара. Маны тэҥэ, кыайыылааҕы бэлэмнээбит тренер 10 тыһ. солк. харчынан бэлиэтэниэ. Ону таһынан, күрэхтэһии спонсордарын көмөтүнэн анал бириистэр туттарыллыахтара.

Финалга тахсар иһин тустуулары уонна быһаарыылаах хапсыһыылары “Саха” национальнай көрдөрөр-иһитиннэрэр хампаанньа “күөх экранынан” быһа көрдөрүөҕэ.

Күрэхтэһии чэрчитинэн пресс-конференция; “Первый” диэн, Роман Дмитриевкэ анаммыт хаартысканан альбом-кинигэ сүрэхтэниитэ; кулун тутар 7 күнүгэр Р.М. Дмитриев өйдөбүнньүгэр сибэкки дьөрбөтүн ууруу сиэрэ-туома ыытыллыахтара.

Күрэхтэһии торума

Кулун тутар 7 күнэ, бээтинсэ

10:00-15:00 Кыттааччылары суруйуу, бэлиэтэнии

16:00-17:00 Судьуйалар сүбэ мунньахтара

17:00-18:00 Тэрийээччилэр – хамаандалар салайааччыларын уонна тренердэри кытта мунньахтара

18:00-18:30 Бары ыйааһыннарга сэрэбиэй.

Кулун тутар 8 күнэ, субуота

07:30-08:00 Медицинскэй көрүү уонна ыйааһыннаныы

10:00-17:00 Бары ыйааһыннарга барыллааһын хапсыһыылар

17:00-19:00 Финалга тахсар иһин киирсиилэр.

Кулун тутар 9 күнэ, өрөбүл

07:45-08:00 Иккис ыйааһыннаныы

10:00-15:00 Уоскутар бөлөх тустуулара

15:00-16:00 Тохтобул

16:00-17:00 Күрэхтэһиини үөрүүлээхтик аһыы

17:00-20:00 Быһаарыылаах хапсыһыылар. Кыайыылаахтары наҕараадалааһын.

Тэрийээччилэр быһаарыыларынан, күрэхтэһиигэ киирии – босхо. Барыгытын, Роман Дмитриевкэ ананан ыытыллар тэрээһиннэргэ көхтөөхтүк кыттаргытыгар ыҥырабыт!

Петр ПАВЛОВ.  

Василий Семенов (Москва) хаартыскаҕа түһэриитэ.