Амман-2025: утарсааччыларбыт кимнээҕий?

Иордания Амман куоратыгар Азия көҥүл тустууга чемпионата кулун тутар 29 күнүттэн саҕаланар. Иннинээҕи күн бары ыйааһыннарга ким кими кытта тустарын быһаарар сэрэбиэй буолла. Биллэрин курдук, быйылгы Азия чемпионатыгар саха тустууга кыһатын икки иитиллээччитэ кыттар. Иккиэн Таджикистан аатын көмүскүүллэр: Айаал Белолюбскай (57 кг) уонна Виктор Рассадин (70 кг).

Бастакы ыйааһыҥҥа 15 бөҕөс сэрэбиэйи ааспыт. Парижтааҕы Олимпиада боруонса призера Гуламжон Абдуллаев (Узбекистан) рейтинг быһыытынан бастакы нүөмэринэн талыллан, маҥнайгы эргииргэ сынньанар, уоннааҕылар квалификацияҕа тусталлар. Ылан көрдөххө, Абдуллаевы тэҥэ бу ыйааһыҥҥа өссө казах Калжан, иранец Вализаде, кыргыз Сманбеков курдук – норуоттар икки ардыларынааҕы таһымҥа биллэр-көстөр бөҕөстөр бааллар.

Биһиги Айаалбыт сэрэбиэйгэ бу састаапка иккис киһинэн талылынна. Кини бастаан дьоппуон Сакамотоны кытта тустуоҕа. Санатан эттэххэ, ааспыкка Албанияҕа буолбут турнирга кини үчүгэй тустууну көрдөрбүтэ. Онон бу да сырыыга ситиһиилээхтик кыттарыгар баҕарабыт. Сакамото сэрэхтээх, дьоппуоннар билигин тустуулара сайдан турар. Барытын көбүөр быһаарыа.

Бу бөлөххө Сманбеков бастаан индус Ширагы кытта киирсиитэ тыҥааһыннаах буолуон сөп. Атын киирсиилэргэ Хан (Хотугу Корея), Батхуяг (Монголия) утарсааччыларын хотоллоро буолуо…

70 киилэҕэ – 13-лэр. Састаап күүстээх диэххэ сөп. Дьоппуон Оаяги, кыргыз Ахматалиев, Казахстантан Куулар, монгол Тумур, биһиги Рассадиммыт, иранец Халили – бары даҕаны тэҥ сыһа таһымнаах тустууктар.

Сеткаҕа көрөргүт курдук, Виктор иккис бөлөххө баар. Кини бастаан көбүөр хаһаайына Меслаҕы кытта көрсөр. Иккискэ Халилины кытта тустуоҕа. Сина Халили – Иран тахсан эрэр инники эрэлэ. Былырыын аан дойду чемпионатыгар, эчэйиини ылбыт Амир Язданины солбуйан, куһаҕана суох өйдөбүлү хаалларбыта. Москваҕа ыытыллыбыт Россия – Иран хамаандаларын табаарыстыы көрсүһүүлэригэр Курбан Шираевка тэҥ киирсиигэ сабырыйтарбыта. Ол да буоллар, биһиги бэйэбит бөҕөспүтүгэр эрэнэбит…

Онон, кэтэспит тустуубут кэллэ. Билиҥҥитэ билгэлээһин оҥорортон туттунабыт. Бөҕөстөрбүтүгэр ситиһиилээх кыттыыны баҕарабыт. Биһиги дуоһуйа көрүөхпүт, ыалдьыахпыт.

Бастаан – 57, 65, 70, 79, 97 кг ыйааһыннаахтар тусталлар. Хапсыһыылар субуота күн Дьокуускай бириэмэтинэн 17:00 чаастан саҕаланаллар. Финаллар түүн 00:00 ыытыллаллар.

Петр ПАВЛОВ.