Афанасий Заболоцкайга улахан махтал!

Ааспыт бээтинсэ сарсыарда эрдэттэн үлэһэн, Дьокуускай – Бороҕон такситынан күрэхтэһии тэрийсэ барыахтаах этибит. Арай, 07:00 барыахтаах таксибыт мэлигир, ватсаапка да, телефоҥҥа да хоруйдаабат. Этэргэ дылы, эрэннэрэн баран отуойкаҕа олорто, саатар тугу ди биллэрбэт.

Биһиги күрэхтэһии саҕаланыытыгар 10:00 чааска баттаһыахтаах дьон ыксаатыбыт. Хойутаары гыммыт дьон онно-манна звоннаан, түрүлүөн түһэрдибит. Биир да массыына, такси сарсыарда барбат буолан биэрдэ. Бары эбиэттэн киэһэ айанныыллар эбит.

Онуоха “Уус Алдан тустуута” ватсаап-бөлөххө, баҕар биир эмэ киһи массыына булуутугар сүбэлиэ диэн суруйбуппар, арай чочумча буолан баран, биллиилээх бөҕөс Афанасий Заболоцкай телефоннаан, мин илдьиэм диэн уоскутта. Онон, сотору буолаат, айаннаатыбыт.

Ити курдук, ыксаллаах түгэҥҥэ түбэспит дьоҥҥо тутатына көмөҕө кэлбит үтүө санаалаах Афанасий Ивановичка барҕа махтал! Сымнаҕас олбохтоох массыынанан биһигини илдьэн-аҕалан биэрбитигэр.

Афанасий Заболоцкай – көҥүл тустууга норуоттар икки ардыларынааҕы кылаастаах спорт маастара, Саха сирин икки төгүллээх чемпиона (1998, 2000), алта төгүллээх призёра, “Нациялар кубоктара” диэн аан дойду хамаанданан күрэхтэһиитин кыайыылааҕа (1998), Англияҕа, Узбекистаҥҥа, Белоруссияҕа, Польшаҕа, Грецияҕа, Турцияҕа ыытыллыбыт түһүлгэлэргэ ситиһиилээх бөҕөс. Хапсаҕайга Саха сирин чемпиона (1995). Уус Алдан улууһун бочуоттаах гражданина.

Киниэхэ кытаанах доруобуйаны, дьолу-соргуну, куруук табыллыыны, этэҥҥэ буолууну баҕарабыт!

Дьоҥҥо көмөҕө кэлэр Үтүө санаа өрүү чэчирии турдун! Оттон Бороҕон такситын итинник үлэтэ, киһиэхэ сыһыана бөрүкүтэ суох көстүү диэххэ сөп. Эһиги санааҕытыгар хайдаҕый?

Петр ПАВЛОВ.

Виктор ЭВЕРСТОВ хаартыскаҕа түһэриитэ.