Афанасий Заболоцкай оҕолору көбүөргэ ыҥырар

Муус устар 4-5 күннэригэр Бороҕоҥҥо, норуоттар икки ардыларынааҕы кылаастаах спорт маастара Афанасий Заболоцкай бирииһигэр 2010-2011 сс. төрөөбүт кыргыттарга уонна уолаттарга көҥүл тустууга республикатааҕы аһаҕас 21-с күрэхтэһии ыытыллар.

Бу түһүлгэ нэһилиэктэн, салгыы улуустан саҕалаан, билигин республика оҕолорго биир улахан таһымнаах күрэхтэһиитэ буола үүннэ. Элбэх саҥа ааттар таҕыстылар. Өссө, бу күрэхтэһии биир уратыта диэн, дэлэй бириистээҕэ буолар. Бириистэр сыл аайы тупсарыллан, киэркэйэн иһэллэр.

Күрэхтэһиини оҕо спордун республикатааҕы тэрилтэтэ уонна Уус Алдан улууһун дьаһалтата үүннээн-тэһииннээн ыыталлар.

Тустуу Н.Н. Тарскай аатынан Спорт дыбарыаһыгар буолар. Уолаттар – 38, 41, 44, 48, 52, 57, 62, 68, 75, 85, 100 кг, оттон кыргыттар – 33, 39, 46, 50, 54, 62, 66 кг тустуохтара.

Күрэхтэһии торума

Муус устар 4 күнэ, бээтинсэ

14:00-16:00 Кыттааччылары бэлиэтээһин.

16:00-17:00 Хамаандалар бэрэстэбиитэллэрин уонна судьуйалар сүбэ мунньахтара.

17:00-17:30 Бары ыйааһыннарга сэрэбиэй тардыыта.

Муус устар 5 күнэ, субуота

08:00-08:30 Бары кыттааччылар ыйааһыннаныылара.

10:00-11:00 Барыллааһын хапсыһыылар.

11:00-11:30 Күрэхтэһиини үөрүүлээхтик аһыы.

11:30-13:30 Күрэхтэһии салгыыта.

13:30-14:00 Күнүскү аһылык.

14:00-17:00 Барыллааһын уонна уоскутар бөлөх тустуулара. Быһаарыылаах хапсыһыылар. Кыайыылаахтары наҕараадалааһын.

Хас ыйааһын ахсын кыайыылаахтар уонна иккис-үһүс буолбуттар тустаах грамоталарынан, сиэдэрэй оҥоһуулаах мэтээллэринэн наҕараадаланыахтара. Маны таһынан кыайыылаахтар статуэткалары тутуохтара. Ону тэҥэ күрэхтэһии бастыҥнара анал бириистэринэн биһирэниэхтэрэ. Ол курдук, “Түһүлгэ бастыҥ бөҕөһө”, “Кыайыыга дьулуурун иһин”, “Бастыҥ хапсыһыы иһин”, “Бастыҥ судьуйа” бириистэр туттарыллыахтара.

Афанасий Заболоцкай – көҥүл тустууга норуоттар икки ардыларынааҕы кылаастаах спорт маастара, Саха сирин икки төгүллээх чемпиона (1998, 2000), алта төгүллээх призёра, “Нациялар кубоктара” диэн аан дойду хамаанданан күрэхтэһиитин кыайыылааҕа (1998), Англияҕа, Узбекистаҥҥа, Белоруссияҕа, Польшаҕа, Грецияҕа, Турцияҕа ыытыллыбыт түһүлгэлэргэ ситиһиилээх бөҕөс. Хапсаҕайга спорт маастара, Саха Республикатын чемпиона (1995), Саха сирин норуоттарын спортивнай оонньууларын кыайыылааҕа. Уус Алдан улууһун, Байаҕантай нэһилиэгин бочуоттаах гражданина.

Афанасий Иванович Заболоцкай билигин Тутуу матырыйаалларын киинин генеральнай дириэктэринэн үлэлиир. 

“Дьулурҕан”.