Афанасий Егорович, быдан дьылларга быраһаай

Бүгүн кутурҕаннаах соһуччу сонун кэллэ. Саха спордун биир уһулуччулаах салайааччыта – 1963-1971 сс. “Урожай” спорт уопсастыбатын бэрэссэдээтэлэ, 1976-1986 сс. Саха АССР спорка кэмитиэтин бэрэссэдээтэлэ, Россия уонна Саха сирин физическэй култуураҕа уонна спорка үтүөлээх үлэһитэ, Саха сирин норуотун хаһаайыстыбатын үтүөлээх үлэһитэ, спорт сахалыы төрүт көрүҥнэригэр Манчаары оонньууларын төрүттээччи, Саха Республикатын спорт эйгэтигэр Д.П. Коркин аатынан Судаарыстыбаннай бириэмийэтин лауреата, оһуохайга Дархан этээччи Афанасий Егорович АЛЕКСЕЕВ биһиги кэккэбититтэн өлөн туораата.

Афанасий Егорович былырыын Н.Н. Тарскай төрөөбүтэ 100 сылыгар аналлаах тэрээһиннэргэ барытыгар көхтөөхтүк кыттыбыта. Ол курдук, Саха Республикатын Правительствотын 2 №-дээх дьиэтигэр ыытыллыбыт үөрүүлээх тэрээһиҥҥэ; саҥа кинигэ сүрэхтэниитигэр; Уус Алдан Баатаҕайыгар буолбут республикатааҕы ыһыахха; “Туймаада” стадиоҥҥа анал стендэ аһыллыытыгар кыттыбыта, барытыгар бэйэтин санаатын сайыччы эппитэ, ахтыытын оҥорбута. Итиннэ барытыгар биһиги бииргэ алтыһан сылдьыбыппыт.

Оттон Саҥа дьыл аҕай иннинэ саха театрыгар тэриллибит Н.Н. Тарскай сылын түмүктүүр тэрээһиҥҥэ кини суоҕа. Кэлин билбитим, ыалдьар буолан кэлбэтэҕэ. Биһиги бары, Афанасий Егорович быйыл сайын Тааттаҕа, бэйэтэ төрүттээбит Манчаары оонньууларыгар сылдьыаҕын, дьон-сэргэ истиҥ тылын, махталын ылыаҕын баҕарбыппыт…

Афанасий Егорович туһунан “Олохпун спорду кытта ситимнээн” (Дьокуускай, 2013) диэн суруналыыс В.П. Коротов хомуйан, бэлэмнээн кинигэ оҥорон таһаарбыта. Онно кини инники олоҕо, үлэтэ барыта сиһилии сырдатыллыбыта. Ол кинигэттэн, Афанасий Алексеев спортсмен быһыытынан ситиһиилэрин билиһиннэрдэххэ, кини 5 уонна 10 км дистанцияларга сүүрүүгэ Саха АССР 17 төгүллээх чемпиона; 5 уонна 10 км дистанцияларга Сибиир уонна Дальнай Восток түөрт төгүллээх чемпиона; РСФСР тыатын сирин спортсменнарын 5 км сүүрүүгэ үрүҥ көмүс призера; ССРС тыатын сирин спортсменнарын 5 м сиргэ сүүрүүлэригэр боруонса мэтээллээх…

Хомолтолоох курус түгэнинэн кини дьиэ кэргэнигэр, оҕолоругар, сиэннэригэр, аймахтарыгар, республика спорка общественноһыгар, бары билэр, ытыктыыр дьонугар дириҥ кутурҕаммытын тиэрдэбит. Саха спорда сайдыытыгар тугунан даҕаны кэмнэммэт сүдү кылааты киллэрбит үтүө киһи, талааннаах салайааччы, спорт бэтэрээнэ Афанасий Егорович Алексеев туһунан сырдык өйдөбүл биһиги сүрэхпитигэр өрүү тыыннаах буолуоҕа. Кинини кытта алтыспыт түгэннэрбин хаһан даҕаны умнуом суоҕа.

Кэриэстэбил күннэргэ сөп түбэһиннэрэн, үтүө өйдөбүл быһыытынан, араас тэрээһиннэргэ Афанасий Егоровиһы түһэрбит хаартыскаларбын тэҥҥэ тутабын.

Петр ПАВЛОВ.

Ааптар хаартыскаҕа түһэриилэрэ.