Лев Павлов – Европа икки төгүллээх кыайыылааҕа

Албания киин куоратыгар Тиранаҕа, 23-гэр диэри саастаахтарга спортивнай тустууга Европа күрэхтэһиитэ үгэннээн ыытылла турар. Биллэрин курдук, бу түһүлгэҕэ Россия сүүмэрдэммит хамаандатын састаабыттан саха тустууга кыһатын үс иитиллээччитэ кыттар.

Бастакынан көбүөргэ көҥүл тустууктар таҕыстылар. Онуоха биһиги эрэлбит, кэлиҥҥи кэмҥэ тумус туттар тустуукпут Лев Павлов 57 киилэҕэ чаҕылхайдык тустан, бүтүн Саха сирин дьонун сүрдээҕин үөртэ, астыннарда. Кинилэр эрэллэрин түһэн биэрбэтэ.

Быйылгы сылга киирэн баран Лев – Красноярскайга ыытыллыбыт Иван Ярыгин аатынан норуоттар икки ардыларынааҕы турнирга иккис миэстэни ылбыта. Аны билигин эдэрдэргэ Европа кыайыылаа5ынан буолла.

Санатан эттэххэ, бу күрэхтэһиигэ кыттыан иннинэ, хамаандаҕа ким киирэрин быһаарар хапсыһыыга кини эдэрдэргэ Россия былырыыҥҥы кыайыылааҕа, Ярыгин быйылгы турнирын үһүс призера, дагестанец Юсуп Явбатировы баһыйа туппута. Ол хапсыһыы анал үөрэтэр-эрчийэр түмсүү кэмигэр Владикавказка буолбута.

Оттон Тирана көбүөрүгэр уолбут азербайджанец Имановы 3:0, македонец Штержовы 10:0, украинец Абрамовы 10:0 уонна быһаарыылаах киирсиигэ грузин Зангаладзены 6:1 ахсааннарынан эрэллээхтик кыайталаата. Итинэн кини Россия хамаандата ситиһиилээхтик кыттарыгар суолу тэлэн биэрдэ. Лев бу ситиһиитин улуу бөҕөс Бувайсар Сайтиев сырдык кэриэһигэр анаата.

Кырдьык да, Лев тустуута тустубут. Туран, кэтэмэҕэйдээн хаалбакка, кимээһиннээх тустууну көрдөрдө. Утарсааччыларын наар ыган, тустууну бэйэтэ көҕүлээн ыыппытын бэлиэтиир тоҕоостоох. Ити курдук дьонун барыларын өй-санаа, тактика уонна техника өртүнэн баһыйа тутта. Уолбут сэргэх тустуутун көрөн бары астынныбыт.

Манна даҕатан эттэххэ, Лев Павлов – Европа икки төгүллээх кыаыйыылааҕынан буолла. Былырыын 21-гэр диэри саастаахтарга тэҥнээҕин булбатаҕа.

Түгэнинэн туһанан Леви, кини тус тренерэ Николай Даниловы, СР хамаандатын сүрүн тренерэ Вадим Семеновы, бары сыһыаннаах тэрилтэлэри уонна дьону эҕэрдэлиибит!

Уоскуйбаппыт, күрэхтэһии салҕанар. Аны Тирана көбүөрүгэр гректии-римнии тустууга Александр Андреев, дьахталлар тустууларыгар Евгения Огородникова кыттыыларын эрэнэ кэтэһэбит.

«Дьулурҕан».