Өксөкүлээх Өлөксөй төрөөбүт күнүгэр

Кулун тутар 16 күнэ – саха литературатын төрүттээччи, саха олоҕун чинчиһитэ, норуотун сырдыкка сирдээбит Алексей Елисеевич Кулаковскай – Өксөкүлээх Өлөксөй төрөөбүт күнэ.

Р.М. Дмитриев аатынан Олимпийскай эрэл училищетыгар бу бэлиэ күҥҥэ аналлаах тэрээһини саха тылын учуутала Л.Н. Гаврильева, библиотекарь А.К. Сивцева Саха сиригэр сылын ахсын ыытыллар «Свет Кулаковского – Өксөкүлээх сардаҥата» акцияны ыыттылар.

Оҕолор Өксөкүлээх Өлөксөй олоҕун, айар үлэтин туһунан, кини суруйан хаалларбыт чулуу айымньыларын кытта билсистилэр,  выпускниктар хоһоон аахпыттарын сэҥээрэ иһиттилэр. «Путь в вечность» киинэни көрөн, айар тыл аҕата норуотум туһа диэн санаанан салайтаран үлэлээбитин олус сөҕө-махтайа көрдүлэр. Маны таһынан билиилэрин чиҥэтэн тургутук толордулар.

Өксөкүлээх Өлөксөй – саха норуота уйгулаах олоххо, билиигэ-көрүүгэ талаһалларын туһугар баар санаатын-оноотун ууран туран үлэлээбит, олоҕун бүүс-бүтүннүүтүн онно анаабыт киһи.

Людмила ГАВРИЛЬЕВА, саха тылын уонна литэрэтиирэтин учуутала.

Алла Сивцева хаартыскаҕа түһэриитэ.