Василий Бурцев кэриэһигэр бэргэннэр күрэхтэһиилэрэ

Ааспыт өрөбүлгэ, ол эбэтэр, олунньу 23 күнүгэр нэһилиэкпитигэр, биир дойдулаахпыт, «Мужества» орден кавалера, полиция капитана Бурцев Василий Васильевич сырдык аатын үйэтитиигэ биирдиилээн кыайыы иһин салгын саатынан ытыыга 8-с төгүлүн турнир буолан ааста.

Ахсыс сылын ыытыллар күрэхтэһии сүрүн тэрийээччилэрин этиилэринэн, балаһыанньаҕа арыый уларытыылар киллэриллэн ыытылынна. Ол курдук, быйылгы турнир түөрт категориянан: оскуола үөрэнээччилэрэ, дьахталлар, эр дьоннор уонна бэтэрээннэр диэн ыытылынна. Ону таһынан Бэрт Ууһун бэргэн ытааччылара эрэ диэн буолбакка, чугастааҕы Өлтөх нэһилиэгин спорсменнара эмиэ кыттыыны ылан, күрэхтэһиини кэлэн сэргэхситтилэр, киэргэттилэр.

Күрэхтэһиигэ Бэрт Ууһуттан, куораттан кэлбит биир дойдулаахтарбытын уонна өлтөхтөрү кытта барыта 43 бэргэн ытааччы кыттыыны ылла.

Балаһыанньа быһыытынан Белка упражнениенан, тииҥ уруһуйдаах сыалга биэстиитэ олорон, сытан уонна туран ытан, икки эргииринэн ким саамай элбэх очконы ыларыгар күрэхтэстилэр. Күрэхтэһии бэрт сыыдамнык, көхтөөхтүк, тыҥааһыннаахтык ааста.

Күрэхтэһии түмүгүнэн маннык түмүктэр таҕыстылар:

Бастакы категорияҕа оскуола үөрэнээччилэригэр 120 очкону ылан, Иванов Коля бастакы миэстэни ылары ситистэ, иккис миэстэ 77 очколаах Стручкова Айыллаан уонна үһүс миэстэ 59 очколаах Олесова Сардаана буоллулар.

Дьахталларга олус тыҥааһыннаах тэҥ киирсии кэнниттэн эбии ытыы түмүгүнэн 96 очколаах Копырина Александра бастакы миэстэ ылары ситистэ. Иккис миэстэ Местникова Алина уонна 95 очколаах үһүс миэстэ – Бурцева Валерия.

Эр дьоҥҥо 55 саастарыгар диэри 20 күрэхтэһээччиттэн, саамай бастыҥнар 189 очколаах Явловскай Василий, ол кэнниттэн олох аҕыйах очконан хаалан (182) Олег Черкашин иккис уонна үһүс миэстэ – эдэр кэскиллээх ытааччы 166 очкону ылан Стручков Айаал буолла.

Бэтэрээннэргэ олох эрэллээхтик 172 очкону ылан Валерий Стручков бастаата, иккис миэстэ 135 очколаах Иван Неустроев уонна үһүс миэстэ 132 очколаах Василий Копырин буолан, пьедесталга тахсан турдулар.

Күрэхтэһии саамай күүтүүлээх түгэнэ 4 категорияттан алта чулуу көрдөрүүлээх ытааччылар тахсаннар, ким бу күн саамай бэргэнин, абсолютнай чемпионун быһаарсыы буолла:

1. Явловскай Василий – 189 очколаах;
2. Черкашин Олег – 182 очколаах;
3. Стручков Валерий – 172 очколаах;
4. Стручков Айаал – 166 очколаах;
5. Стручков Иван – 163 очколаах;
6. Петров Василий – 151 очколаах.

Бу күн саамай бэргэн, чулуу ытааччыта (биир подходунан 99 очкону ылан) Абсолютнай чемпионунан Олег Черкашин буолла.

Призердар бары мэтээллэринэн, сыаналаах бириистэринэн, оттон абсолютнай  чемпион көһө сылдьар кубогынан наҕараадаланнылар.

Бу күн призердарга уруккуттан да буоларын курдук, сүрдээх элбэх сыаналаах бириистэр туттарылыннылар, маны таһынан анал бириистэр хаһаайыннарынан буоллулар: Бурцев Геннадий, Иван Стручков, Александр Шепелев, Петр Тарскай (Бэйдиҥэ) – Кыайыыга дьулуурдарын иһин; Александр Петров – Бэргэн ытааччы (саамай элбэхтэ десятканы таппытын иһин); Алексей Слепцов – Тииҥи харахха таппытын иһин; Герман Бурцев – Бастакы холонуу уонна Талбан Явловскай, Толя Копырин – Эдэр кэскиллэр.

Василий ПЕТРОВ, күрэхтэһии кылаабынай судьуйата.