Тарскай-2025: Сылыктааһыным төһө сөп түбэстэ?

Сунтаарга, Н.Н. Тарскай кэриэһигэр көҥүл тустууга Саха Республикатын 2025 сылга ыйааһыннарынан биирдиилээн уонна хамаанданан бастыыр иһин 67-с чемпионат үгэннээн ыытылла турар.

Бэҕэһээ сэрэбиэйи көрөөт даҕаны, кылгас билиһиннэрии уонна финалга кимнээх тахсыахтарын сөбүн туһунан сылыктааһын оҥорбутум. Ону, төһө да сэмэйэ суоҕун иһин, бүгүҥҥү күн түмүгүн кытта бэйэм тэҥнээн көрөргө сананным. Төһөтө сөп түбэстэ диэн бэйэни тургутаары. Дьиҥэ, бу билгэлээһин төһө туолбутун атын, сыһыаннаах киһи ырыппыта эбитэ буоллар, өссө ылыннарыылаах, эппиэтинэстээх буолуо этэ дии саныыбын.

57 киилэҕэ Любомир Ашеин уонна Кэскил Семенов бастакы миэстэ иһин көрсөр буоллулар. Ол аата, мин сылыктааһыным туолла.

61 кг Федор Постников эрэлбин түһэн биэрбэтэ. Ол оннугар Яков Павловым хотторон кэбистэ… Артем Слепцову, ааспыкка Дальнай Восток чемпионатыгар тустуутун көрөн баран, наһаа итинник буолуо суоҕа дии санаабытым, киһим хонноҕо аһыллан туһунна.

65 кг финалга тахсааччылары наһаа чопчута да суох буоллар, сөпкө таайбыппын: Уйгулаан Иванову уонна Юлиан Григорьевы.

70 киилэҕэ, тустуу көбүөрүгэр бүтэһигин холонорго быһаарыммыт Ньургун Скрябин быһаарыылаах хапсыһыыга тахсарын сэрэйбитим. Оттон кини утарсааччытынан эмиэ норуоттар икки ардыларынааҕы кылаастаах спорт маастара Николай Охлопков (Сунтаар) буолуо дии санаабатаҕым. Эрэммит уолаттарым хотторон кэбистилэр.

74 киилэҕэ Константин Капрынов уонна Айсен Потапов тахсыахтара диэн сөпкө сылыктаабыппын.

79 кг ыйааһыҥҥа Николай Сивцев финалга тахсарын таайбыппын. Финалга кини утарсааччытынан Албан Аввакумов, эбэтэр Тимур Николаев буолуохтара диэбитим да, дьонум сүрүн түһүлгэҕэ 70 киилэҕэ тустар Олег Фомиҥҥа хотторон кэбистилэр.

86 киилэҕэ Анатолий Никитин эрэлбин толордо. Иккис финалиһы тоҕо эрэ ааттаабакка хаалбыппын.

92 кг Андриан Ленскэй уонна Владимир Данилов кыһыл көмүс мэтээл иһин киирсиэхтэрэ диэн билгэлээһиним туолла.

97 киилэҕэ опыттаах Ньургун Сергин бастакы миэстэ иһин киирсэрин сөпкө эппиппин. Манна эмиэ иккис финалиһы ааттаабатахпын. Ол аата, Сергин чемпионнуур диэтэҕим.

Ыарахан ыйааһыҥҥа Никита Хабаров уонна Никита Софронов бастакы миэстэни былдьаһыахтара диэн сылыктааһыным туолла.

Онон чемпион аатын былдьаһыахтара диэн ааттаабыт дьоммуттан – 15-һин сөпкө эппиппин. Аны, хорсун санаабын киллэрэн, чемпионнары таайыыга холоннохпуна, ыйааһыннарын бэрээдэгинэн – Ашеин, Слепцов, Григорьев, Скрябин, Капрынов, Фомин, Никитин, Ленскэй, Сергин, Софронов бастыахтара дии саныыбын. Ону эһиги туох диигит?

Петр ПАВЛОВ.