Төрүт ох саанан ытааччылар ситиһиилэрэ

Олунньу 6-8 күннэригэр Орёл куоракка Россия ох саанан ытыыга федерациятыгар бастыыр иһин күрэхтэһии буолан ааста.

Чөмпүйэнээт Орёл куорат «ГРИНН» диэн элбэх хайысхалаах туристическай киинигэр  ыытылынна. Саха сириттэн 35 спортсмен кыттыыны ылла. Төрүт охторунан ытыыга – 18 дьахтар, 10 эр киһи. Көнө ох саанан ытыыга – 1 эр киһи, классическай, сыала суох оҕунан ытыыга – 3 дьахтар уонна 3 эр киһи күрэхтэстилэр.

Россия ох саанан ытыыга федерациятыгар ФСЛ чөмпүйэнээтин түмүгүнэн, Саха сирин спортсменнара маннык көрдөрүүлэри ситистилэр:

Төрүт оҕунан ытыыга дьахталлар ортолоругар (33 кыттааччы) Варвара Унарова үрүҥ көмүс, Анастасия Протопопова боруонса мэтээллэр хаһаайкаларынан буоллулар.

Эр дьон ортотугар (35 кыттааччы) Максим Васильев – кыһыл көмүс, Егор Баранов – үрүҥ көмүс, Павел Алексеев-Стасов боруонса мэтээллэри түөстэригэр кэттилэр.

Классическай сыала суох оҕунан ытыыга: эр дьон ортотугар (56 кыттааччы) Александр Дьяконов – кыһыл көмүс мэтээл хаһаайынынан буолла уонна Россия спордун маастарын нуорматын толордо, – диэн Орёл куораттан Саха сирин сүүмэрдэммит хамаандатын  сүрүн тириэньэрдэриттэн биирдэстэрэ Михаил Алексеев иһитиннэрдэ.

Уйбаан УЙГУУРАП. Хаҥалас.

Хаартыскалар Михаил Алексеев архыыбыттан туһанылыннылар.