Сүүрүүнэн үһүс сылбын дьарыктанабын

В.Г. Румянцев аатынан оҕо спортивнай оскуолатыгар чэпчэки атлетиканан үгүс оҕо утумнаахтык дьарыктанар. Сүүрүүгэ, ыстаҥаҕа, многоборьеҕа улууспут чиэһин куруутун ситиһиилээхтик көмүскүүбүт.

Мин Бүлүүтээҕи И.Л. Кондаков аатынан  гимназия 9 «б» кылааһын үөрэнээччитэбин. Сүүрүүнэн үһүс сылбын дьарыктанабын. Тренерим Рожина Туяра Ивановна, Саха Өрөспүүбүлүкэтин уопсай үөрэхтээһин уонна физическэй култуураҕа туйгуна, РФ бастакы категориялаах судьуйата.

Уопсайа икки сменанан 50 оҕо буолан дьарыктанабыт. Биһиги улахан кылаастар үөрэхпит кэннэ киэһэ өттүгэр дьарыктанабыт. Спордунан дьарыктаныы киһини бэрээдэктээх, күннээҕи режимы сөпкө аттарар, үрдүккэ тардыһар буоларга үөрэтэр. Сүүрүүбүт таһынан өссө атах оонньууларыгар, хотугу многоборьеҕа, ГТО-ҕа, национальнай многоборьеҕа уонна физкултуура олимпиадатыгар улууска, өрөспүүбүлүкэҕэ көхтөөхтүк кыттабыт. Элбэх оҕо Бүлүү улууһун уонна өрөспүүбүлүкэ хамаандатыгар баарбыт.

Бу ааспыт 2024 сылга биһиги 4-тэ улууска, 8-та өрөспүүбүлүкэҕэ бастыыр иһин, 2-с региональнай Дальнай Восток күрэҕэр, 6-та Россия таһымнаах, норуоттар икки ардыларынааҕы ахсыс “Азия оҕолоро” оонньууга ситиһиилээхтик  кытынныбыт.

Ааспыт сыл саамай улахан ситиһиибитинэн Данилов Владислав 8-с Норуоттар икки ардынааҕы “Азия оҕолоро” оонньууларга сүүрүүгэ 400 м барьердаах сүүрүүгэ 2-с миэстэни ылбыта. Ону таһынан Маслов Юра, Буслаев Андрей, Данилов Владислав  Хабаровскай, Ярославль, Санкт-Петербург, Улан Удэ, Сочи куораттарга Россияҕа региональнай күрэхтэргэ сүүрүүгэ 2-3 миэстэни ылбыттара.

Капитонова Алина, Степанов Марат, Степанова Аэлита, Софронов Святослав уонна мин өрөспүүбүлүкэҕэ бастыыр иһин сүүрүүгэ, ыстаҥаҕа, ядроны быраҕыыга бары 1, 2, 3 миэстэни ылары ситиспиппит. Мин бииргэ дьарыктанар оҕолорум үрдүк ситиһиилэринэн киэн туттабын.

Түгэнинэн туһанан тренербэр, төрөппүттэрбитигэр, гимназиябыт салалтатыгар, оҕо спортивнай оскуола салалтатыгар (дириэктэр Осипов Г.Д.), өрөспүүбүлүкэ сүрүн тренеригэр Ариносова Татьяна Кузьминичнаҕа уонна сүбэһиппитигэр, психолог-массажиспытыгар Макарова Прасковья Игнатьевнаҕа, оҕо спорда сайдарыгар көмө буолар, өйөбүл буолар спонсордарбытыгар барҕа махтал буоллун.

Наина ИОНОВА, 9-с кылаас үөрэнээччитэ, И.Л. Кондаков аатынан Бүлүү гимназията, өрөспүүбүлүкэ чэпчэки атлетикаҕа хамаандатын чилиэнэ.