Петя миигин олус сөхтөрбүтэ

// “Дьулурҕан” 25 сыла

Петр Павловы кытта «Республика бүттүүнэ» хаһыакка бииргэ үлэлээбиппит. Кини Геннадий Бечеряковтыын хаһыаппыт успуорка сыһыарыытын, «Дьулурҕаны» таһаараллара.

Петяттан көҥүл тустуу ыйынньыктарын уларсарым. Сэбиэскэй кэм да саҕана бэрт сэдэх таһаарыылар буоллаҕа (библиографическая редкость). Петя ыксаппат этэ, син уһуннук, наҕылыччы көрүтэлиирим, төһө баҕарар уһуннук илдьэ сылдьарым.

Кэлин дьиэтигэр сылдьан архыыбын, тэтэрээттэрин, кинигэлэрин көрбүтүм. «Тустуу бэрэпиэссэрэ диэн сөпкө да ааттаабыттар», – диэн санааҕа кэлбитим.

Дьиэтэ – дьиҥнээх тустуу музейа этэ.

– Биэнсийэҕэ таҕыстахпына чааһынай, төлөбүрдээх бибилэтиэкэ арыныам, – дии-дии Петя күлбүтэ-үөрбүтэ. Араас энциклопедиялар, ыйынньыктар, күрэхтэһии программалара, вымпеллар, былакааттар, значоктар… Итилэр баһыйар үгүстэрин мин, успуорду оҕо эрдэҕиттэн интэриэһиргиир киһи саҥа көрбүтүм.

Петр Павлов успуорт статистига буоларын өрдөөҕүттэн билэрим. Бэйэм да футбол уонна хоккей араас сыыппараларын-чахчыларын тэтэрээттэргэ бэрэлиир аҕай киһи буоллаҕым. Ол да буоллар, Петя миигин олус сөхтөрбүтэ. Олимпиадалар, ССРС уонна Россия, Европа уонна аан дойду чемпионаттарын да сиһилии билэр манан аҕай дьыала буолбатах ээ. Ол үрдүнэн кини бэрт элбэх күрэхтэһиилэр статистикаларын суруйар, түмэр эбит этэ. «Дан Колов», «Али Алиев», «Тахти Куубага»…

Аны улахан эрэ дьон статистиката буолбатах, уолаттар, эдэрдэр, бэтэрээннэр күрэхтэһиилэрэ (кадеты, юноши, юниоры) барыта.

– Тыый, үлэ да үлэ дии, – диэн олус сөхпүтүм.

– Маннык дьаһанарым бэйэбэр интэриэһинэй, – диэбитэ кини. – Аны бөҕөстөргө анал тэтэрээттэрдээхпин. Ол тэтэрээттэргэ архыыбым «сүөгэйин» сурунабын. Оччотугар бөҕөс успуорка олоҕо ырылыччы тахсан кэлэр. Мин курдук маннык дьаһанан үлэлиир биир дьарыктаахпын баччааҥҥа диэри көрсө иликпин.

Петр Павлов син уһун кэмҥэ аан дойду тустууктарын рейтиннэрин таһаарара. Уонна: «ФИЛА (билигин UWW) итинник рейтининэн салайтаран тустууктары сэрэбиэй кэмигэр сиэккэлэргэ араарыахтаах», – диэн мэлдьи этэрэ, суруйара. Ити баҕа санаата олоххо киирбитэ.

Ити архыыбыттан «Покорившие Олимп» диэн түөрт альбом-кинигэ төрөөн-үөскээн тахсыбыта. Билигин кини «Аан дойду чемпионнара» диэн кинигэҕэ үлэлии сылдьар. Ону тулуйбакка-тэһийбэккэ кэтэһэбин…

Федор РАХЛЕЕВ, суруналыыс.