«Дьулурҕан» спорду сайыннарыыга кылаата улахан

// “Дьулурҕан” 25 сыла 

«Кэскил» уонна «Юность Севера» хаһыаттар редакцияларыгар отдел редакторынан үлэлии сырыттахпына, Бүөтүр Павлов «Дьулурҕаҥҥа» үлэлии кэл диэн ыҥырбыта. Үөрүүнү кытта сөбүлэспитим. Ити сылларга «Саха сирэ» хаһыат «Дьулурҕан» сыһыарыыта саха дьонугар спорду сырдатыыга сүрүн таһаарыы этэ диэтэхпинэ, сыыспатым буолуо.

Сахабыт сиригэр бастакы нүөмэрдээх спорка – көҥүл тустууга Бүөтүр Павлов киэҥ ырытыылара, ардыгар кириитикэлээх да ыстатыйалара киэҥ сэҥээриини, кэпсэтиини таһаараллара. Спорт бары көрүҥнэригэр биир да улахан түһүлгэни аһарбакка суруйарбыт.

Үлэлиир кэбиниэппитигэр өрөспүүбүлүкэ бары муннуктарыттан спорт фанаттара, сэҥээрээччилэрэ быыстала суох сыбыытыыллара. Бүөтүр бириэмэ булан барыларын кытта кэпсэтэрэ, санаатын атастаһара. Сүүһүнэн суругу ыыталлара. Онуоха сүрүн боппуруоһунан кэлэр нүөмэргэ ким суругун таһаарабыт, ким уочарата буоларын быһаарыы буолара. Нүөмэр тахсара чугаһаатаҕына, төлөпүөн тохтообокко тырылыыра. Ыстатыйалара тоҕо тахсыбатын «быһаарса» ааптардар бэйэлэринэн тиийэн кэлэр түгэннэрэ элбэх буолара. Бүөккэ кинилэри хайдах эрэ алы гынан утаартыыр быһыылааҕа. Онон кэлбит матырыйааллары нүөмэргэ аттарыы улахан ускуустубаны, имигэс буолууну ирдиирэ.

Эрэдээксийэбит биир туспа хайысха ыалдьыттарынан – өрөспүүбүлүкэ биллэр спортсменнара, тренердэрэ буолаллара.  Бэчээт дьиэтин иккис этээһигэр баар «Дьулурҕан» кэбиниэтигэр элбэх улахан ааттаах-суоллаах уһуйааччылар, ат бөҕө, кус быһый, Саха сирэ киэн туттар бастыҥ дьоно ыалдьыттаан, ирэ-хоро кэпсэтэн ааспыттара.

Спортивнай суруналыыстар, таһараа ыалбыт, «Якутия» хаһыат кэриспэндьиэнэ Георгий Татаринов, итиэннэ Баһылай, Александр Посельскайдар, Михута, Иигэр Былатыанап, Владислав Коротов, Николай Константинов кэбиниэппит аанын саппат кэриэтэ этилэр.  Күрэхтэһиилэр түмүктэрин, спорт сайдыытын араас ыйытыыларын уоттаахтык-күөстээхтик ырытыһыылар үгүстүк буолаллара.

Кылгас кэмҥэ «Дьулурҕаҥҥа» үлэлээбит үтүө күннэрбин бүгүн ахта саныыбын. Спорт эйгэтигэр сылдьан элбэх үтүө дьону кытта билсибитим, кэпсэппитим, улахан түһүлгэлэргэ үрдүккэ, чыпчаалга дьулуур үгүс холобурун көрбүтүм. Ити барыта салгыы үлэлиирбэр-хамныырбар, олохпор төһүү буолбута.

Бу ааспыт үйэ чиэппэрэ кэмҥэ өрөспүүбүлүкэҕэ спорт сайдыытыгар, саха дьоно спордунан дьарыктаныытыгар «Дьулурҕан», Бүөтүр Павлов улахан кылааты киллэрдилэр. Бүөтүрдүүн хам-түм бассаабынан, төлөпүөнүнэн кэпсэтэбит-ипсэтэбит, күрэхтэһиилэр түмүктэрин ырытыһабыт. Бүөтүр бүгүн саҥа үйэни кытта тэҥҥэ хаамсан, хапсыһыылары видеоҕа устан, кэпсээн интернет куйаарыгар таһаарара, көрүөххэ, истиэххэ үчүгэй. Киниэхэ махтанан туран, «Дьулурҕаны» сайыннарыыга салгыы ситиһиилэри баҕарыам этэ.

Сергей МУКСУНОВ, Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспатын үлэһитэ.