«Дьулурҕан» – спорду сырдатар бастакы хаһыаппыт

// “Дьулурҕан” 25 сыла

Быйыл «Дьулурҕан» хаһыаппыт 25 сыллаах үбүлүөйүн бэлиэтиибит. Онон сиэттэрэн спортсменнар уонна спорт бэтэрээннэрин ааттарыттан бу хаһыаты төрүттээбит Галина Алексеевна Бочкареваҕа уонна хаһыат эрэдээктэрэ Петр Семенович Павловка улахан махталбытын этиэхпитин баҕарабыт.

2000 сыллаахха «Өрөспүүбүлүкэ бүттүүнэ» хаһыат иһинэн «Дьулурҕан» спортивнай сыһыарыыны таһаарар буолбуттара, онон биһиги спорт эйгэтин үлэһиттэрэ сүрдээх сэргэхсийбиппит. Бу хаһыат бэрт кылгас кэм иһигэр киэҥник тарҕаммыта. 1999 сыллаахха Саха Өрөспүүбүлүкэтин бастакы президенэ Михаил Ефимович Николаев «Азия оҕолоро» норуоттар икки ардыларынааҕы иккис спортивнай оонньууну тэрийэргэ уурааҕа тахсыбыта, онон бу хаһыат эмиэ күүскэ үлэлээбитэ. «Дьулурҕан» – биһиги бастакы спорт эйгэтин сырдатар хаһыаппыт буолар.

Оттон 2000 сыллаахха «Спортивная Якутия» хаһыаты Александр Петрович Керемясовка туруорсаммыт, ити сыл бэс ыйыгар бастакы нүөмэрин таһаарбыппыт уонна бэрт таһаарыылаахтык өр сылларга үлэлээбитэ. Бүтэһик сылларга ити хаһыаппыт уонна «Спорт Якутии» сурунаалбыт үп-харчы көстүбэккэ тохтообуттара.

Петр Семенович ханнык да ыарахаттартан чаҕыйбакка, “Дьулурҕанын” үлэтин тохтотон кэбиспэккэ, ситимнээхтик үлэлээн, «Забота-Арчы» хаһыат иһинэн ситиһиилээхтик таһаара олорор. Хаһыат билигин 4 балаһанан тахсар, кэлин 8 балаһанан нууччалыы-сахалыы тахсара буоллар, ол аата, икки суруналыыстаах буолара буоллар, диэн баҕа санаалаахпыт. Инникитин даҕаны сүппэккэ-симэлийбэккэ тахса турарыгар баҕарабыт. Биһиги, спорт бэтэрээннэрэ, спорт эйгэтин үлэһиттэрэ өрүүтүн сүбэ-ама буолуохпут диэн этэбин.

Петр Семенович, маладьыас, кытаат! Бары бииргэ буолуоҕуҥ, оччоҕуна хаһыаппыт өрүү тыыннаах буолуоҕа.

Михаил ДРУЗЬЯНОВ, Саха Өрөспүүбүлүкэтин спорка уонна физическэй култуураҕа миниистирин сүбэһитэ.