Чемпионаттан үөскээбит санааларым

Республикабыт чемпионатын, быһа Сунтаартан, бэҕэһээ НВК-ҕа биэрдилэр. Интэриэһинэйэ сүрдээх. Арассыыйа ааттаахтара тустуук-уолаттарбыт сорохторо бастаабатылар. Чурапчы улууһун өрөгөй ырыата балачча иһилиннэ.

Баҕар сыыһарым буолуо, ол эрээри, араспаанньаларыттан сылыктаатахха, олимпийскай чемпион Павел Пинигинниин биир нэһилиэктэн (былыргы Хадаартан) төрүттээх үс уол бастаата.

Олег Фомин финалга утарылаһааччытын илиилээх-атахтаах оҥорбото, 10 очкону кэлтэччи хомуйан, көрөөччүнү астыннарда. Арааһа, чемпионат бастыҥ бөҕөһө да буолбута буолуо дии саныыбын.

Оттон Никита Софронов өрөгөй ырыатын тылын билэр буолан, ыллаһарыттан сылыктаатахха, дьиҥнээх төрүөҕүттэн ити улуус киһитэ. Софроновтар диэн “Эмэнньики” аҕатын ууһугар иҥпит араспаанньа. Кини улахан түһүлгэлэргэ миэстэлэһэр, хайҕалга киирбит Хабаровы эмиэ эрэллээхтик кыайда. Никиитэ 125 киилэлээх уол диэтэххэ, иһэ суоҕа, чахчы бухатыыр көрүҥнээх чырбаллыбыт уол эбит. Итинник уолаттары олоҥхоһуттар олоҥхолоругар, тылларынан ойуулаан эрдэхтэрэ. Уолаттарбыт көрүҥнэрэ тупсубут.

Никиитэни дагестанецтарга илдьэн, дьиҥин билиэххэ наада эбит. Көрдөххө, Хабаров уруккутун курдук кимиэллээхтик киирсибэтэ, форматыгар киирбэккэ сылдьар бадахтаах. Урут тоҕута-хайыта тыытан, Арассыыйа чемпионатыгар сүрдээх буолар этэ. Бэйэтин уолаттарыгар сымнаан хаалар дуу, тугуй?

Ити гынан, биир “хадареһы” көтүтэ сыстым. Константин Капрынов эмиэ Хадаартан төрүттээх эбит. Уопсайынан, Хадаар нэһилиэгэ дьикти дойду. Аата да этэрин курдук, үлэҕэ-хамнаска, дьарыкка хадаардастахха, бэриммэт буоллахха ситиһиилэнэҕин. Оннук хаачыстыба бу нэһилиэк дьонун хааныгар угулла сылдьар.

Ньургун Скрябин финалга куттуу сырытта. Букатын 0:3 ахсаанынан кыайтаран испитэ, аҕыйах бириэмэ хаалыар дылы. Ол гынан баран, кэлин дьэ уһуктан, киһитин күөрчэх курдук эргитэн, хата кылбар кыайыыны ылла. Бүтэһик тустуутугар кыайыыны бэйэтигэр аҕалла.

Ньургун сүрдээх холку майгылаах, үтүө эр киһи буолара интервью биэрэригэр, тутта-хапта сылдьарыгар көстөр. Уол оҕо үс кырыылааҕа, Дьобуруопа дойдутугар маҥанрусстары илиилээх-атахтаах оҥорбокко, көҥүл сырытта. Аны уолун онно хаалларан кэлбит. Аҕыйах ахсааннаах омук да буолларбыт, уонунан мөлүйүөн нэһилиэнньэлээх дойдуга тиийэн, уонунан сылларга бастыҥ Баатыр буоларбыт дьикти. Өссө сиэмэбитин хаалларан кэллэхпит.

Ити курдук, 1-2 чаас ону-маны оҥоро  сылдьан, тустууктарбытын таарыччы көрөн, НВК-ларга махталлаах хаалабын.

Федот ХАРИТОНОВ, Мэҥэ Хаҥалас.

Хаартыскаҕа: Саха сирин үстүү төгүллээх чемпионнарынан буолбут Олег Фомин уонна Никита Софронов.