Бырааттыы Морфуновтар бириистэригэр

Чурапчы сэлиэнньэтигэр А.И. Федотов аатынан Спорт киинигэр ССРС спордун маастара, ССРС эдэрдэргэ чемпиона, Саха Өрөспүүбүлүкэтин Н.Н. Тарскай бирииһин икки төгүллээх чемпиона, элбэх турнирдар кыайыылаахтара, Саха Өрөспүүбүлүкэтин физическэй култуураҕа уонна спорка үтүөлээх үлэһитэ, Россия физическэй култуураҕа уонна спорка туйгуна, Чурапчы улууһун, Арыылаах нэһилиэгин Бочуоттаах гражданиннара Семён Семёнович Морфунов үбүлүөйдээх 75  сааһыгар анаммыт, бырааттыы Морфуновтар бириистэригэр көҥүл тустууга аһаҕас турнир ыытылынна.

Турнирга Дьокуускай куораттан, өрөспүүбүлүкэ улуустарыттан барыта 59 бөҕөс күөн көрүстэ. Бу кэмҥэ өрөспүүбүлүкэбит бастыҥ көрдөрүүлээх тустууктара, ол иһигэр соторутааҕыта буолбут Иван Ярыгин турнирын кыттыылаахтара кытыннылар. Александр Авелов, Артем Слепцов, Любомир Ашеин, Олег Фомин, Андрей Мидловец, Федор Постников, Егор Явловскай уо.д.а. көбүөргэ тахсыылара көрөөччүлэри сэргэхситтэ.

Турниры үөрүүлээхтик аһыыга улуус баһылыга Степан Саргыдаев, улуус мунньаҕын председателэ Яков Оконешников, кырдьаҕастар сэбиэттэрин председателэ Герасим Платонов, Чурапчытааҕы спортивный институт ректора Иннокентий Готовцев, Арыылаах нэһилиэгин дьаһалтата, нэһилиэк баһылыктара, уо. д. а. эҕэрдэ тыл эттилэр. Кинилэр бырааттыы Морфуновтар спорка ситиһиилэрин  киэн тутта аҕыннылар, Семён Семенович спорка, үлэҕэ инники сылдьарыттан үөрэллэрин, астыналларын биллэрдилэр. Кинини “Улуус сайдыытыгар үтүөлэрин иһин” бастакы степеннээх, ”Бочуоттаах ветеран” бэлиэлэринэн наҕараадалааһыны ытыс тыаһынан доҕуһуоллаатылар.

Иван Ярыгин турнирын үрүҥ көмүс призера Константин Капрыновы чиэстээһин буолла. Чурапчы чулуу тустуугар, тренеригэр Егор Пономаревка ситиһиини баҕардылар.

Турнир кыайыылаахтарынан, призердарынан буоллулар:

61 кг диэри ыйааһыннаахтарга 1. Фёдор Постников, 2. Любомир Ашеин, 3. Егор Явловскай, Артём Слепцов.

65 кг диэри: 1. Александр Авелов, 2. Эдуард Попов, 3. Николай Заболоцкай, Манчаары Ильинов.

70 кг диэри: 1. Игорь Матвеев, 2. Владислав Кривошапкин, 3. Иннокентий Антонов, Пётр Ксенофонтов.

74 кг диэри: 1. Олег Фомин, 2. Николай Захаров, 3. Ньургун Степанов, Давид Чириков.

Кыайыылаахтарга наҕараадалар, бириистэр туттарылыннылар.

Алексей СЛЕПЦОВ, Чурапчы.

Ааптар хаартыскаҕа түһэриитэ.