Былырыын 8 чөмпүйүөннээх этибит. Оттон быйыл?

Олунньу 14-15 күннэригэр биһиги Дьокуускайбытыгар, “Кыайыы 50 сыла” Спорт дыбарыаһыгар көҥүл тустууга Уһук Илин федеральнай уокурук дьахталларга уонна эр дьоҥҥо чөмпүйэнээтэ ыытыллар.

Бу түһүлгэ сүрүн соругунан, аны сайын бэс ыйыгар Москваҕа ыытыллыахтаах Арассыыйа чөмпүйэнээтигэр бастыҥнары сүүмэрдээһин, талыы буолар. Ол курдук, дьахталлар уон ыйааһыҥҥа: 50, 53, 55, 57, 59, 62, 65, 68, 72, 76 кг, эр дьон эмиэ уон ыйааһыҥҥа: 57 кг, 61, 65, 70, 74, 79, 86, 92, 97, 125 кг күөн көрсүөхтэрэ. Хас ыйааһын ахсын кыайыылаахтар уонна иккис-үһүс миэстэлээхтэр туһааннаах дипломнарынан уонна мэтээллэринэн наҕараадаланыахтара.

Санатан эттэххэ, иллэрээ сыл Улан-Удэҕэ буолбут чөмпүйэнээккэ Саха сирин эр дьоҥҥо хамаандата сэттэ кыһыл көмүс мэтээли ылбыта. Оттон былырыын Аллараа Бэстээххэ ыытыллыбыт күрэхтэһиигэ бөҕөстөрбүт аҕыс ыйааһыҥҥа бастаабыттара. Бу сырыыга дьэ хайдах буолар? Иннинээҕи көрдөрүүлэр ситиһиллиэхтэрэ дуо? Ону билэрбит аҕыйах хонук хаалла.

Биллэн турар, сүрүн утарсааччыларбыт – буряттар. Быйыл кинилэр кэккэлэригэр Пурбо Эрдынеев (57 кг), Алдар Бальжинимаев (61 кг), Александр Богомоев (65 кг), Сандан Гармаев (70 кг), Тамир Ешинимаев (79 кг), Илья Жибалов (97 кг), Балдан Цыжипов (125 кг) курдук күүстээх бөҕөстөр бааллар.

Чөмпүйэнээт барыла:

Олунньу 14 күнэ, бээтинсэ

10:00-15:00 Кыттааччылары бэлиэтээһин.

16:00-16:30 Судьуйалар уонна хамаанда салайааччыларын кытта сүбэ мунньахтара.

17:00-18:00 Дьахталларга уонна эр дьоҥҥо бары ыйааһыннарга сэрэбиэй.

Олунньу 15 күнэ, субуота

08:00-08:30 Кыттааччылар ыйааһыннаныылара.

10:00-18:00 Бары ыйааһыннарга барыллааһын тустуулар.

12:00-12:30 Чөмпүйэнээти үөрүүлээхтик аһыы.

18:30 – Бары ыйааһыннарга быһаарыылаах хапсыһыылар. Кыайыылаахтары наҕараадалааһын.

«Дьулурҕан».