Боксёрдарбыт ситиһиилэрэ

Олунньу 17-21 күннэригэр Горнай улууүун киинигэр Бэрдьигэстээххэ, РСФСР уонна Саха АССР үтүөлээх тириэньэрэ Арсентий Петров сырдык кэриэһигэр 19-40 саастаах дьоҥҥо Сахабыт сиригэр буоксаҕа бастыыр иһин чөмпүйэнээт ыытыллан түмүктэннэ.

Биһиги улууспутуттан үс кэскиллээх боксёр кытынна. Манна Оҕо спортивнай оскуолатын ыстаарсай тириэньэрэ Николай Платонов буоксаҕа уһуйбут, икки сыл дьарыктаабыт уола Максим Припузов 48 кг ыйааһыннаахтарга чөмпүйүөннээтэ, кыһыл көмүс мэтээл хаһаайынынан буолла. Улахан Аантан СӨ үтүөлээх тириэньэрэ Виктор Пудов иитиллээччитэ Андрей Егоров 54 кг иккис миэстэни ылла, үрүҥ көмүс мэтээли кэттэ уонна Покровскай куораттан тириэньэр Игнат Сивцев эрчийэр уола Данил Давыдов (бастакы тириэньэрэ Вячеслав Устинов) 54 кг пьедестал үһүс үктэлигэр таҕыста, боруонса мэтээли ылла.

Уолаттарбыт рингэҕэ байыастыы кииристилэр, тэҥ киирсиилэргэ сабырыйтардылар.

Эрэнэр уолаттарбыт олимпийскай чөмпүйүөн Роман Дмитриев аатынан Олимпийскай эрэл училищетыгар үөрэнэллэр. Андрей Егоров былырыын РФ спордун маастарын нуорматын толорбута. Оттон Максим Припузов маастар нуорматын быйыл толорон, үктэлтэн үктэлгэ тахсан иһэллэр. Бу уолаттары билигин училищеҕа аатырбыт боксёр убайа, СӨ үтүөлээх тириэньэрэ Николай Егоров уонна өрөспүүбүлүкэ уолаттарга сүүмэрдэммит хамаандатын ыстаарсай тириэньэрэ Андрей Слепцов эрчийэллэр, дьарыктыыллар.

Салгыы үтүө сонуннары күүтэбит.

Уйбаан УЙГУУРАП, Хаҥалас.

Хаартыска тириэньэр Николай Платонов тус архыыбыттан туһанылынна.