Бэртээхэйдик кытынныбыт

Үтүөкэн дьонноох, хайыһардыыр сирдээх-уоттаах, үтүө айылҕалаах, күүстээх хайыһардьыттар Галина Кулакова, Максим Вылегжанин уо.д.а., улуу конструктор Михаил Тимофеевич Калашников дойдуларыгар Аан маҥнайгы любителлэр ортолоругар Россия чемпионатыгар 37 регионтан, 507 киһи кытынна.

“Чысхаан” кулууп салайааччыта Екатерина Семеновна Никитина Саха сирин 18 киһилээх хамаандатын баһылаан-көһүлээн бэртээхэйдик кытынныбыт. 37 хамаандаттан уопсайа 7-с миэстэ буоллубут.

Бүтэһик төрдүс күммүтүгэр 10-20 км классиканан сүүрэммит, бу күн 5-с миэстэ буолбуппут, бу эмиэ улахан ситиһии. Киэҥ Арассыыйа хайыһардьыттарын кытта эгил-тэгил киирсэн, хамаанда 7 мэтээллээх. 81 саастаах Степан Контоев 2 үрүҥ көмүс, 1 боруонса мэтээллээх. 87 саастаах Степан Абрамов 3 боруонса мэтээллээх. 55 саастаах Марина Пухова – 20 км боруонса мэтээл хаһаайката буолла.

Бары мэтээл ылбыт, хамаандаҕа элбэх очкону аҕалтаабыт дьоммутугар улахан эҕэрдэ уонна махтал мааныта буолуохтун. Дьахталлар хамаандалара эстафетаҕа алтыс, ахсыс, эр дьоммут тохсус буолбуттара – эмиэ элбэх очкону аҕалла.

Барҕа махтал буолуохтун, 2013 сыллаахха “Чысхаан” кулуубу тэрийбит салайааччыбытыгар Екатерина Никитинаҕа, кини солбуйааччытыгар Василиса Слепцоваҕа уонна бука бары Саха сирин чиэһин көмүскээбит хайыһардьыттарбытыгар.

Лидия АРГУНОВА.