Атынтан атыҥҥа…

Элбэх сыл биир спорт көрүҥэр дьарыктанан, кыттан, ситиһиилэнэн баран, атыҥҥа көһөр хайдаҕа эбитэ буолла?

Холобура Конор Макгрегор быраабылата суох киирсииттэн боксаҕа Флойд Мэйвезердиин киирсэн хотторбута. Буолаары буолан, биир да хотторуута суох, профессиональнай боксерга, Мэйвезергэ киирэр. Конор UFC үксүн илиинэн охсуһууга хотор буолан, бэйэтигэр эрэннэҕэ. Бокса диэн ураты буоллаҕа. Элбэх сыл дьарыгы, дьулууру эрэйэр, техникатын, тактикатын баһылыан наада. Панкратионҥа тоҕута кулаан охсуһан, охтортуур буоллум да, боксаҕа киирэбин диэн буолбатах.

Фрэнсис Нгнанну эмиэ UFCтан боксаҕа киирэн, Тайсон Фьюрины алҕас табан, туймаарда сылдьан баран эр ылбыта. Ону кэнники кинини Энтони Джошуа дөйүппүтэ. UFCҕа Фрэнсиһи охторон далбаарда да сылдьыбатахтара. Оттон боксаҕа өссө халыҥ бэрчээккэнэн охсон Джошуа отой “дириҥ далайга тимирдэн” тыла суох ыыппыта. Онон билэн баран дураһыйбыттара ордук курдук.

Арай тустууктар панкратион араас көрүҥэр көһөн, син тустуунан киирэн ылар курдуктар. Хабиб Нурмагомедов, Дэниэль Кормье, Хамзат Чимаев курдуктар тустууттан киирбиттэрэ. Оттон тустууттан боксаҕа киирэн, биллэр чемпион буолбут биллибэт.

Алекс Перейро кикбоксаттан UFC киирэн аатырда. Ол эрээри, тустуута мөлтөх. Онон кинини Хамзат Чимаев дуу, Магомед Анкалаев дуу алҕаһатан боҕутуннарыахтарын син. Ол эрээри, киһи бу диэн быһаарбат. Баҕар атахха киирэн иһэн, тобугунан тэбиллэн умса хоруйуохтарын син. Онон эрдэ быһааран “паровоз иннигэр сүүрэр” табыллыбат.

Бу сотору Алекс Перейро Магомед Анкалаевы кытта киирсиэхтээх. Биллэн турар, биһиги Россия байыаһыгар Анкалаевка ыалдьабыт. Көрүөхпүт буоллаҕа.

Ородьумаан.