Ыйыт – хоруйдуубут: «Покорившие Олимп» кинигэ баар дуо?

Бу күннэргэ, хайдах эрэ сүбэлэспит курдук, хас да киһи, көҥүл тустууга олимпийскай чемпионнар тустарынан «Покорившие Олимп» кинигэни ылыахпытын баҕарабыт, баар дуо, эбэтэр салгыытын, саҥа кинигэни таһаардыҥ дуо диэн ыйыталлар. Ордук соҕурууттан.

Онно хоруйдуурга сананным. Бастатан туран, урукку, Токиотааҕы Олимпиада кэнниттэн 2021 сыллаахха тахсыбыт кинигэ 1000 ахсаанынан бэчээттэнэн, тута кэриэтэ бүппүтэ. Онон билигин миэхэ ол кинигэ суох.

Иккиһинэн, «Покорившие Олимп» кинигэ салгыыта баар буолар дуо уонна ол хаһан тахсарый диэн ыйыталлар. Кырдьык, оруннаах ыйытыы. Ситимин быһыытынан, Парижтааҕы Олимпийскай оонньуулар кэннилэриттэн итинник ыйынньык-кинигэ оҥоһуллан тахсыахтаах этэ…

Ону мин, хамнастаах үлэм таһынан – айар үлэбэр киэптэтэн, эрдэ кэпсэппиппит, илии тутуспуппут быһыытынан, биир кэмҥэ хас да улахан суолталаах кинигэҕэ тэҥҥэ ылсан кэбиһэн, биир тылынан, үлэҕэ үтүрүттэрэн, көҥүл тустууга олимпийскай чемпионнар тустарынан кинигэни кэмигэр салгыы оҥорон таһаарбатым диэн билинэбин.

Аны онно хас да төрүөттээх. Бэлиитикэттэн сылтаан билигин күрэхтэһиилэр киһи санаабытын курдук, күүстээхтэри барыларын биир түһүлгэҕэ түмэн ыытыллара кыаллыбат буолла. Барыта хааччах, мэһэйдэһии. Холобур, Заур Угуев, Шамиль Мамедов, Заурбек Сидаков, Артур Найфонов, Абдулрашид Садулаев Олимпиадаҕа кыттар кыахтаах этилэр да – Парижка киллэриллибэтэхтэрэ.

Мин итинник көстүүттэн хомойобун. Ол иһин эрдэттэн «Покорившие Олимп» кинигэни салгыыр санаам хайдах эрэ түһэн хаалбыта. Дьиҥнээх, сиэрдээх чемпионнар тахсыа суохтар диэн санааттан.

Ол гынан баран, ити бырайыагы быраҕан кэбиспэппин. Син биир ситэн ылан кэлин даҕаны буоллар таһаарыаҕым, салгыаҕым. Үчүгэй кэмнэр кэллиннэр…

Петр ПАВЛОВ.