Ярыгин кубога-2025: Бастакы ыйааһын сэрэбиэйэ хайдаҕый?

Сарсыҥҥыттан Красноярскайга, икки төгүллээх олимпийскай чемпион Иван Ярыгин кэриэһигэр спортивнай тустууга (эр дьоҥҥо уонна дьахталларга) норуоттар икки ардыларынааҕы турнир саҕаланар. Оттон бүгүн киэһэ бары ыйааһыннарга сэрэбиэй буолла.

57 киилэҕэ биһигиттэн алта бөҕөс кыттар. Ол курдук, Лев Павловы уонна Юнус Явбатировы, күүстээхтэр диэннэр, сэрэбиэйдээһиҥҥэ араарбыттар. Павлов – бастакы, Явбатиров – иккис сеткаҕа киирбиттэр. Бу ыйааһыҥҥа барыта 25 бөҕөс сэрэбиэйи ааспыт. Аны сарсын сарсыарда бары ыйааһыннаныахтаахтар.

Бастакы бөлөххө квалификацияҕа Айаал Белолюбскай – Абдурахимовы (С-Петербург), Яков Павлов – Жилясовы (Оренбург), Артём Слепцов – Седены (Тыва) кыттар көрсөр буолбуттар. Лев Павлов күрэхтэһиини иккис эргииртэн саҕалыыр. Кини Белолюбскай – Абдурахимов кыайыылааҕын кытта тустуоҕа. Бу бөлөххө өссө Муталиев, Чебодаев, кубинец бааллар.

Иккис бөлөххө квалификацияҕа Любомир Ашеин – Хумидовы (Красноярскай), Федор Постников – Абдурахмановы (С-Петербург) кытта киирсэллэр. Манна Мехтиханов уонна Начын Монгуш бастакы эргииргэ сирэй көрсөр буолбуттар. Өссө Явбатиров (Дагестан), Баяндуев (Бурятия) курдук биллэр бөҕөстөр бааллар.

Сэрэбиэйи хайдах даҕаны сирэр-талар, талымастыыр кыахпыт суох. 25 кыттааччыттан – 18-һа россияннар. Биирдии Таджикистан, Куба, Кытай, Азербайджан, Корея, икки Монголия бөҕөстөрө бааллар. Кинилэр ааттара – улахан көбүөргэ билиҥҥитэ иһиллибэтэх ааттар. Ол аата, эдэрдэр. Онон сэрэйдэххэ, мэтээл иһин сүрүннээн россияннар бэйэлэрэ киирсэллэрэ буолуо.

Россия чемпионатын үрүҥ көмүс призера, эдэрдэргэ Европа чемпиона, аан дойду призера Лев Павловка эрэлбит улахан. Финал чиэппэригэр кини Муталиевтыын тустуута тыҥааһыннаах буолуон сөп. Ол да буоллар, хаһан баҕарар буоларыныы, лидертэн ирдэбил кытаанах. Лев бу састаапка кыайыахтаах! Бу бөлөх аллараа өттүттэн Артём Слепцов сэрэбиэйэ куһаҕана суох диэн көрөбүн. Барыта бэйэтиттэн тутулуктаах.

Иккис бөлөххө Любомир Ашеин сорунан туран туһуннаҕына – Хумидовы уонна корееһы ааһыахтаах. Күүһүн-кыаҕын, өйүн-санаатын түмэн туран эрэ тустуон наада. Миндиашвили турнирыгар сатаан аһыллыбатаҕа. Федор Постников эмиэ хайаан да киирсиэхтээх. Санаабытыгар, финал аҥарыгар иккиэн тиийиэхтэрин сөп. Онтон салгыы дьолуолара билиэҕэ.

Түмүктээн эттэххэ, наһаа быһа эппэккэ, уолаттарбытыгар ситиһиилээх тустууну баҕарабыт. Көбүөр таҥарата кинилэргэ мүчүк гынарыгар көрдөһөбүт. Итиэннэ Ярыгин турнирын кыраҕытык кэтээн көрүөхпүт, бэйэбит уолаттарбыт хапсыһыыларын сыаналыахпыт.

Кылгастык 57 киилэ сэрэбиэйин билиһиннэрдэххэ итинник.

Петр ПАВЛОВ.