“Тымныы Оҕонньор” бирииһигэр

Афанасий Парфенов аатынан спортивнай комплекска “Тымныы Оҕонньор” бирииһигэр остуол тенниһин уонна бильярд көрүҥнэригэр аһаҕас күрэхтэһиилэр буоллулар.

Спортсменнары Бэрдьигэстээх нэһилиэгин баһылыга, бильярд көрүҥүн федерациятын салайааччыта Алексей Аргунов, спорт бэтэрээннэрэ, тенниһин көҕүлээччилэр Радомир Сидоров, Анатолий Осипов, Егор Павлов эҕэрдэлээтилэр.

Остуол тенниһигэр 21 спортсмен икки бөлөххө арахсан оонньоото.

Кэрэ аҥардарга, уопуттаах Элена Романова иннигэр кими да киллэрбэтэ. Иккис миэстэни Надежда Уразбахтина бэркэ эриһэн туран ылла. Спорт бу көрүҥүн утумнааччы, көҕүлээччи Кудаисовтар дьиэ кэргэнтэн Антонина Максимова үһүс миэстэҕэ таҕыста.

Бэрт сытыы киирсиилэр кэннилэриттэн “саҥа саҕалааччыларга” Анатолий Сидоров (Кэптин) тэҥнээҕин булбата. Иккис миэстэни Василий Шкулев (Бэрдьигэстээх) ылары ситистэ. Үһүскэ 11-с кылаас үөрэнээччитэ Артем Сидоров (Кэптин) тахсан, үгүс дьону соһутта.

Уопуттаах тенисистэргэ хардары таары кытаанах оонньуулар буоллулар. Бары да араас таһымнаах күрэхтэһиилэргэ кыттыбыт, кыайбыт-хоппут буоланнар бэртээхэй оонньуулары көрдөрдүлэр. Түмүккэ, баай уопуттаах Радомир Сидоров (Бэрдьигэстээх) күүскэ эриһэн туран, кыайыыны мүччү туппата. Иккис миэстэни Данил Потапов (Күөрэлээх) ылла. Үһүс Валентин Петров буолла.

Спортсменнар спорт бу көрүҥнэрэ сайдыытыгар улахан болҕомтону уурар, бары усулуобуйаны тэрийэр Бэрдьигэстээх нэһилиэгин, Ыччат политикатын, култууратын уонна спордун агенствотын салалтатыгар махталларын биллэрэллэр.

Вячеслав АЛЕКСЕЕВ, Бэрдьигэстээх, Горнай.

Ааптар хаартыскаҕа түһэриилэрэ.