История

“Тустууну итинник кэпсиэхтээххин!”

Ярыгинныын 1971 сыл диэки ССРС чемпионатыгар Игорь Кудрявцев туста сылдьыбыта, ону ким эрэ, саха комментатора хаһыакка, Кудрявцев сорунан туран тустубакка кыайтарда, диэн суруйбута.

Спорт маастара Николай Босиков тустууну хайдах комментарийдыырын күтүөтүм Григорьев Василий Петрович бэккэ сөбүлээбитин кэпсээччи:

“Биирдэ республика чемпионатыгар (1962 с. диирэ быһыылааҕа) Николай Босиков көбүөр кытыытыгар остуолга микрофонунан комментарийдыы олорор, арааһа радиоҕа анаан буолуо: “Һок, көбүөргэ ыарахан ыйааһыннаах бөҕөстөр Василий Румянцев уонна Георгий Кудряшов таҕыстылар! Тустуу саҕаланна.

Һок! Румянцев өттүктээн чаҕылыннарда, Кудряшов мостикка имигэс баҕайытык тэйэ түстэ!”

Олох, дьиҥинэн, Румянцев өттүктүүрү маарыҥнатан, дөдөхүс гыммытыгар, киһитэ туох да өрүһүлтэтэ суох охтон түстэ, мостик буолуо дуо, полумостка түһэн сытар. Оччолордооҕу биһиги тяжтарбыт үксүлэрэ истээх, дөдөхөчүспүт дьон буолааччылар. Бу да бөҕөстөр оннук дьон! Румянцев Саха сирин ыарахан ыйааһыннаахтарын 60-с сс. саҥаларыгар барыларын баһыйара – күүс да, техника да өттүнэн. Кочан эриһиэн сөбө да, күүс өттүнэн Румяцевка баһыйтарар быһыылааҕа, ол иһин киниэхэ куруук хоттороро.

Биһиги Босиков омуннаан-төлөннөөн, эбэн-сабан, дьиҥнээх буола турары уларытан кэпсиирин истэн күлсэ олоробут: “Тоҕо сымыйанан кэпсиигин, ити аата, мостикка турар дуо?! Кудряшов мостка икки киһи ыйааһынын буолуохтааҕар, соҕотох бэйэтин да ыйааһынын уйуо суоҕа!”

Онуоха Босиков хап-сабар микрофонун илиитинэн саба тутар уонна биһиэхэ хайыһан: “Итинник кэпсиэххэ наада! Радионан истээччилэргэ истэллэригэр үчүгэй, интэриэһинэй, сонун буоларын наадатыгар итиннигэ наада!”, – дии охсубута. Туох диэххиний, күлэн иэрийэ эрэ олордоҕуҥ дии!

Василий ити тустуулары хаартыскаҕа түһэрбит этэ, ол туста сылдьар фотоларын кэтэҕэр ыйааһыннарын суруйбут этэ: “Румянцев – 98 кг, Кудряшов – 118 кг”, – диэн.

Ылдьаа КУОЛАҺАП.

Добавить комментарий

Ваш адрес email не будет опубликован. Обязательные поля помечены *

289249
Бүгүн : 205