Николай Жирков кэриэһигэр…

Тохсунньу 14-18 күннэригэр боксаҕа ССРС спордун норуоттар икки ардыларынааҕы кылаастаах маастара Николай Жирков кэриэһигэр 15-16 саастаах уолаттар икки ардыларыгар күүстээхтэр күрэхтэһиилэрэ ыытылынна.

Барыта 132 эдэр боксер 14 ыйааһыҥҥа ким күүстээҕин быһаарыста.

Күрэхтэһии үөрүүлээх аһыллыытыгар Россия боксаҕа федерациятын үбүлүөйдээх өйдөбүнньүк бэлиэтинэн спорт бэтэрээннэрэ: А.П. Никифоров, Ю.Ф. Федоров, С.С. Аммосов, А.А. Тыасытов, А.Г. Петров, М.Г. Валь, В.В. Пудов, норуоттар икки ардыларынааҕы кылаастаах спорт маастардара Анатолий Филиппов уонна Николай Сантаев, ССРС спордун маастарыгар кандидат Николай Болтунов наҕараадаланнылар.

«Саха Республикатын физическэй култуурата, спорда сайдарыгар кылаатын уонна чөл олоҕу тарҕатыыга көмөтүн иһин» Ил Түмэн бастайааннай кэмитиэтин бэрэссэдээтэлин Махтал суругунан бу күрэхтэһии сүрүн судьуйата Ариан уонна сүрүн секретара Марианна Монастыревтар, Сардаана уонна Филипп Седыхтар дьиэ кэргэттэрэ бэлиэтэннилэр.

Бэйэлэрин ыйааһыннарыгар кыайыылаахтарынан буоллулар: 44 кг – Даниял Курбанов (Нерюнгри), 46 кг – Петр Лукин (Мэҥэ Хаҥалас), 48 кг – Артур Герасимов (Дьокуускай), 50 кг – Тимур Дюжев (Нерюнгри), 52 кг – Виктор Захаров (Марха), 54 кг – Захар Панавкин (Нерюнгри), 57 кг – Ренат Эверстов (Мэҥэ Хаҥалас), 60 кг – Арий Иванов (Хаҥалас), 63 кг – Аман Лукин (Дьокуускай), 66 кг – Александр Артемьев (Ленскэй), 70 кг – Александр Охлопков (Дьокуускай), 75 кг – Артем Желлаев (Өлүөхүмэ), 80 кг – Грачик Барсегян (Алдан), 80-тан үөһэ кг – Илья Мунгалов (Нерюнгри).

Күрэхтэһии түмүгүнэн Бастыҥ боксерунан Мэҥэ Хаҥаластан Петр Лукин ааттанна. Кыайыыга дуьлуурун иһин бирииһинэн Арчыл Павлов (Сунтаар) уонна Эрчимэн Слепцов (Дьокуускай) бэлиэтэннилэр.

«Дьулурҕан».