Күөрэлээхтэр бэйэлэригэр саҥа кэрчиги арыйдылар

Тохсунньу 25-26 күннэригэр Бэрдьигэстээххэ волейболга улуустааҕы күрэхтэһии бэрт көхтөөхтүк барда. Бастыҥ ааты былдьаһа кэрэ аҥардарга алта, эр дьоҥҥо уон хамаанда сытыы киирсиилэри көрдөрдө. Нэһилиэктэртэн ураты 16 №-дээх баһарынай чаас байыастара, оскуола үөрэнээччилэрэ, спорт бэтэрээннэрэ хамаанда туруоран кыттыбыттара кэрэхсэбиллээх.

Бэрт тыҥааһыннаах оонньуулар кэннилэриттэн эр дьоҥҥо бэйэлэрин бөлөхтөрүттэн финал аҥарыгар Одуну, Маҥаны, Маалтааны, Октябрьскайтан «Ойуун ууһа – Бэйэ дьоно» хамаандалара мэтээл иһин киирсэр бырааптаннылар. Өскөтүн инники үс нэһилиэк улууска спорт бу көрүҥэр бастыҥнар кэккэлэригэр сылдьар эбит буоллахтарына, Октябрьскай уолаттара ити дабайыыларын улахан ситиһииннэн ааттыллар.

Ити хамаандалартан финалга тахсыы иһин оонньууга Маалтааны – Октябрьскайы, Маҥаны – Одунуну хотон, пьедестал үрдүкү Чыпчаалын иһин киирсэр кыахтаннылар. Үһүс миэстэни былдьаһыыга «Ойуун ууһа – Бэйэ дьоно» Одуну хамаандатын 2:1 ахсаанынан кыайан үөрүүлэрэ үксээтэ. Нэһилиэкпит спордун историятыгар саҥа кэрчик арылынна диэн киэн тутта эттилэр.

Кыһыл көмүс мэтээл иһин ыаллыы олорор икки нэһилиэк Маҥаны, Маалтааны утарыта тахсыылара элбэх киһи болҕомтотун тарта. Кэптин дьоно-сэргэтэ олус түмсүүлээхтэр. Маннык күрэхтэһиилэргэ «ыалдьааччы» аҕыйаҕа суох түмсээччи. Бу да сырыыга оннук буолла. Ол эрэн, бэрт сытыы оонньуулар кэннилэриттэн 3:1 ахсаанынан Орто Сурт уолаттара, спортивнай майгыларын көрдөрөн кыайыыны ситистилэр.

Кэрэ аҥардарга финалга Одуну кыргыттара улуус киинин хамаандатын хотон, чемпион үрдүк аатын ыллылар. Үһүс миэстэни атамайдар Маалтаны спортсменнарыттан чорбойон, боруонса мэтээлинэн наҕараадаланнылар.

Үтүө үгэс быһыытынан бастыҥ оонньууну көрдөрбүт спортсменнар анал номинациялар туттарылыннылар. Ол курдук, «Кэскиллээх оонньооччу» – Алексена Алексеева (А.Агеев аатынан ОСО), «Көмүскээччи» – Селена Степанова (Атамай), «Кимээччи» – Туйаара Алексеева (Бэрдьигэстээх), «Оонньооччу» – Сайыына Иванова (Одуну) ааттаннылар.

Күрэхтэһии кэмигэр хас хамаанда ахсын эдэр ыччаттар, оскуола оҕолоро сүрүн оонньооччулар быһыытынан сылдьалларын бэлиэтии көрдүбүт. Спорт маассабай көрүҥэр оҕолор кыра эрдэхтэриттэн ураты болҕомто ууруллан, спорка сыһыарыыга сөптөөх үлэ барарын бэлиэтиэҕи баҕарыллар.

Үөрүүлээх наҕараадалааһын кэмигэр Орто Сурт булчуттара волейболистарын ситиһиититтэн үөрэн, киэн туттан туран, үүнэр көлүөнэ ыччаттарыгар сэмэй бэлэхтэрин соһуччу ууннулар. Үчүгэй оонньууну көрдөрбүттэригэр махталларын биллэрдилэр. Октябрьскай нэһилиэгин хамаандаларын кыайыыларыгар кынаттаабыт, улаханнык көмөлөспүт «Бэйэ дьоно» кафе үлэһиттэригэр, урбаанньыт Вячеслав Васильевка, Александр Жирковка истиҥ махталларын тириэртилэр. Спорт сайдыытын өйүүр, өйдүүр дьон бааллара кэрэхсэбиллээх. Инниктин да бииргэ үлэлэһэр санаалаахтара хайҕаллаах дьыала буолар.

Вячеслав АЛЕКСЕЕВ, Бэрдьигэстээх – Горнай.

Ааптар хаартыскаҕа түһэриитэ.